UAnzilom Ndlovu, owayeyimvimbi yamaqembu abalisa eleHighlanders, eleChapungu kanye leQuelaton, uthi ukuqeqetsha abasakhulayo kufuna umuntu ozinikeleyo.
UmfokaNdlovu uqale ukuqeqetsha ngemva kokuba esethethe umhlala phansi ekudlaleni ngomnyaka ka2011.
“Ngithe ngiqalisa ngaqalisa ngisebenza labasakhulayo esikolo seNduba lapho esiphakamise khona inkezo kumncintiswano weIngwebu owabaleminyaka engaphansi kwelitshumi lane. Ngemva kwalokho ngihambe kuqembu leBulawayo Chiefs lapho engafika khona sathatha isicoco sikaDivision One emnyakeni wami wakuqala iqembu lafinyelela kusigaba sePremier Soccer League loba lingasadlalanga. Ubaba uSibanda wangicela ukuba ngisungule iqembu labasakhulayo ngasengiqala ngabaleminyaka engaphansi kwamatshumi amabili.
"Kahle kahle nxa usebenza labasakhulayo usuka ube lomsebenzi omkhulu kabi ngoba abafana babuya bengakwazi lotho kube nguwe omfundisayo. Yikho nxa usebenza labancane laba kumele ube ngumuntu olokuzimisela okukhulu.”
UNdlovu owaziwa kakhulu ngokuthi nguAnzee, uqeqetsha iqembu labasakhulayo eleBulawayo Chiefs lona elikhankasa kusigaba seZimbabwe Football Association Bulawayo Province Division 2.
Kuleloqembu kulendodana yakhe uAnzilom Junior laye odlala eyimvimbi eyesandleni sokudla njengoyise kudala kwakhe.
“Kuyangikhuthaza kakhulu ukuba ngidlala endaweni lapho okwakudlala khona umdala wami njalo kungenza ngibe lokuzithemba.”
UNdlovu omdala udlalele iqembu leHighlanders okwesikhathi eside njalo ubeyingxenye yeqembu elicine ukuphakamisa isicoco seligi ngo2006.
“Ukudlala ngaqala kuqembu leZimbabwe Saints elabasakhulayo lapho engidlale khona okomnyaka owodwa ngidlala kuUnder 13. Ngisuke ngayadlala kuqembu leHighlanders kusukela kuUnder15 ngaze ngayadlala kuqembu labangakayenelisi ukudlalela iqembu elikhulu. Ngithethwe liqembu leChapungu ngo2000 ngadlala okomnyaka owodwa kodwa basebengibiza njalo kuqembu leHighlanders ngo2001 ngadlala khona kwaze kwaba ngu2008.
"Ngalesosikhathi ngiphakamise isicoco seligi kane leqembu leHighlanders. Ngisuke lapho ngayadlala kweleBotswana kuqembu leTaffic Sports Club ngadlala okweminyaka emibili kwathi ngo2010 ngazodlala kuqembu leQuelaton okomnyaka owodwa kwathi ngemva kwalokho ngahle ngaqala ukuqeqetsha.”
Nyakenye uNdlovu ubengumsekeli kaAgent Sawu ngesikhathi iqembu leBulawayo Chiefs elamajaha asakhulayo liphakamisa isicoco kusigaba seBulawayo Province Division 3 okuyikho okwenze ukuba likhuphuke liyedlala kusigaba sikaDivision 2 lonyaka.
Forum