WASHINGTON DC – Kube lokuxokozela okukhulu kumadale eNomination Court kwezinye indawo zelizwe ezigoqela koBulawayo izolo lapho obekubhaliswa khona abazancintisa kukhetho oluzakwenziwa mhlaka 23 ngoNcwabakazi.
Amabizo abaphumelele ukubhalisa azakwaziswa uzulu ngokugcweleyo namuhla.
Kuze kwaba phakathi kwamabili ebusuku kulokhe kuyisixhobexhobe enkantolo kamantshi koBulawayo abancintisayo bezama ukubhalisa.
Inengi labo bekungamalunga ebandla eliphikisayo eleCCC. Abanye baphose behluleka ukubhalisa.
AbeCCC laba bebeke babuyiselwa emuva yiziphathamandla zeNomination Court zisithi kumele bayekwenza iziqondiso emaphepheni abo ngoba ebengahlelekanga kuhle.
Lanxa idale leli beselilamalanga livuliwe njalo libhalisa abancintisayo, abeCCC bakhethe ukuhamba ngosuku olwahlelwa ngokusemthethweni olwayizolo futhi abazange bethule amabizo abazancitnisa bebamele phambilini ngoba besithi babalekela imikhuba ebilakho ukugilwa yizitha zabo.
Kodwa lelibandla beselisolwa ngabanye abasekeli balo izolo besithi alubana lahambisa amabizo kusalesikhathi belingasoze lizithole seliphakathi kokuxokozela konke lokhu obekukhona.
Ibandla leCCC likhala njalo ngokuthi kulamanye amalunga alo ahugwe yizitha zalo ezenhlanganiso esebenza leZanu PF eyeForever Associates Zimbabwe ayabhalisa ukuthi yiwo azancintisa elimele lanxa engayisiwo akhethwe ngabasekeli balelibandla.
Lokhu kutsho ukuthi kwezinye izigaba kulamalunga eCCC amabili abhalisele ukuncintisa esikhundleni sinye.
Umsekeli wesikhulumeli salelibandla uMnu Gift Ostalos Siziba, eloba enkundleni yeTwitter, uthe okwenziwa yiFAZ lamalunga abo lawa yikuganga.
Ngakho, uthe abasoze bakuvumele. Asenelisanga ukukhuluma labeFAZ. Kodwa sebeke bakulandula ukuthi bayangenela kundaba zeCCC.
Ubabhalisele ukuncintisa esikhundleni sikaMongameli welizwe bagoqela umholi weCCC uMnu Nelson Chamisa, uMongameli Emmerson Mnangagwa oweZanu PF lowake waba yisiphathamandla seZanu PF uMnu Savior Kasukuwere yena ozancintisa elilunga elizimeleyo.
Sixoxe lomsekeli wesikhulumeli seCCC uMnu Felix Magalela Mafa oqale ngokusichasisela ingxaki abahlangane lazo koBulawayo.
Ibandla leMDC elikhokhelwa nguMnu Douglas Mwonzora lona lehlulekile ukubhalisa abazancintisa kukhetho belimele elizweni lonke jikelele ngoba lehluleke ukuthola imali.
Amalunga alelibandla atshone labanye eseNomination Court emelele ukubhalisa ethenjiswe yinkokheli yawo ukuthi azahlawulelwa yiMDC.
Kodwa asuke atshelwa ebusuku ukuthi azihambele ngekhaya ngoba ibandla beseliswele imali. Isikhulumeli seMDC uMnu Witness Dube ukufakazile lokhu kodwa uthe sibuze uMwonzora ukuthi kungani behluleke ukubhadalela amalunga abo.
Abebandla leZanu PF bona bathi sebemelele usuku lokhetho lapho abathi bazabhaxabula khona amabandla aphikisayo.
Nanti ilunga lalelibandla uMnu Mabutho Moyo, yena ozangena kuProvincial Council yakoBulawayo emele iZanu PF phansi kohlelo lweProportional Representation nxa lithe lanqoba kulelidolobho.
Umkhokheli webandla leEconomic Freedom Fighters Zimbabwe uMnu Innocent Ndibali yena uthi ubhalisele ukuncintisa kusikhundla sokudinga ozamela iMagwegwe edale lePhalamende hatshi esikaMongameli ngoba engenelisanga inhlawulo yenkulungwane ezingamatshumi amabili, US$20,000 ebhadalwe ngabancintisa ukuba nguMongameli.
Ukuhlaziya udaba lokubhaliswa kwabazancintisa kukhetho lolu sixoxe lomkhokheli wenhlanganiso yeIbhetshu likaZulu uMnu Mbuso Fuzwayo saqala ngokumbuza ukuthi uthini ngengxaki ezihlangane lebandla leCCC.
Amanye amabandla aphikisayo athi awenelisanga ukuhlawulela wonke amalunga awo ukuthi ancintise kuzo zonke izigaba ngenxa yembadalo ephezulu.
Ngalesisizathi ibandla leZapu lithi umholi walo uMnu. Sibangilizwe Nkomo kasoze ancintise kukhetho lukaMongameli.
Oncintise kukhetho luka2018 uMnu. Kwanele Hlabangana owebandla leRepublican Patry of Zimbabwe njalo olilunga lePolad uthi laye kasoze ancintise kusikhundla sikaMongameli lonyaka ngenxa yezinye inhlelo amele aziqhube.
Forum