BULAWAYO - Owadlalela iqembu leOlympics kanye leSupersonic, uDominic Sibanda, uthi abaqeqetshi bakulezinsuku kabadlalisi abasakhulayo ngoba besesaba ukulahlekelwa yimisebenzi.
USibanda, owaziwa kakhulu ngegama elithi Bra Viri, uthi udaba lokuba kungatholakali abasakhulayo abanengi abadlala kusigaba saphezulu lukabili kodwa isisusa ngabaqeqetshi.
“Okokuqala yikuba kuma juniors asisakhuphi kuhle abafana. Phezu kwalokho umfana engabe esevuthwe kanjani abaqeqetshi abaqeqetsha amaqembu akuPremier Soccer League bayesaba ukuxotshwa imisebenzi yikho bayesaba ukubadlalisa kodwa kumele bafana labo bafunde bephakathi kwalabo asebebadala.Lalapho besakhula thina abaqeqetshi akumelanga sibe silokhu sibabisela phansi besiyadlala labancane kulabo kodwa nxa sekumele aye phezulu simekele ahambe.”
USibanda uthi udlale engumfana omncane kuqembu leSupersonic njalo abaqeqetshi kanye labadlali bamemukela kuhle kakhulu.
“Ngikhulele eMpopoma sidlala ibhola eYouth Centre ngesikhathi ngifunda eNkulumane. Ngiqale ukudlala ibhola kuzinga laphezulu ngabo 1980/81 ngidlalela i DRG Vikings lapho engngidlala khona loAlexander Maseko. Ngisuke ngayadlala kuViking Aces eMatshobana lapho engadlala laboBen Phiri labanye abanengi ababedlala kuZimbabwe Saints. Ngisuke lapho ngayadlala kuOlympics laboBoyce Malunga lomdala uBarry Daka ababengikhuthaza kakhulu ngoba yimi engangimncane kulabo bonke ethimini.”
USibanda uthi ibhola lakudala lalinzima lifuna umuntu olesibindi ngoba kunengi ababehlangana lakho.
“Ibhola lakudala lalinzima singazi kumbe kwakusenziwa yikukholelwa emithini yesintu kumbe kwakuyisikhathi sakhona. Ngicabanga sisiyadlala eHwange esathi sesizafika kwamiswa ibhasi kwathiwa akudingwe itshongololo. Angazi lokuthi sasilidingelani kodwa sangena iganga salidinga saze salithola. EHwange kwakutshisa okokuthi ibhola lalidlalwa ngehola lakuqala kumbe elesibili kodwa mhlalokho kwana izulu elalingani lina enkundleni kuphela. Sadliwa kodwa mina ngahlohla igoli engalitshaya lalimaza unozinti weWankie uWeekly Mwale. Lokuthi kwahamba njani lanamhla lokhu angikwazi, ngingakutshela amanga.”
USibanda uthi wekela ukudlala ibhola ngemva kokulimala edlalela iqembu leMethane Tigers elalidlala kusigaba sikaDivision One.
Ngemva kwalokho uqeqetshe amaqembu abalisa eleZupco kanye lele eleGnD. Ngemva kwalokho uqale iqembu labasakhulayo eleMatebeleland Warriors lapho asebenze labadlali ababalisa uButholezwe Ncube oke wadlalela iqembu lesizwe elamaWarriors kanye leleAmaZulu eleSouth Africa.
Forum