WASHINGTON DC — Umphathintambo obona ngezemali uMnu Mthuli Ncube sexwayise omasipala lengatsha zikahulumende ukuthi betshiyane lokuhlawulisa abantu ngemali yakweleMelika kuphela ngoba lokho kuyikwephula umthetho.
Kumbiko awethule izolo, uNcube uthe iziqondiso ezethulwe nguhulumende ngenyanga edluleyo zikubeka sobala ukuthi kumele amakhansili labengatsha zikahulumende babhadalise ngedola leZimbabwe.
Wengeze wathi imali yeZimbabwe - yona esilahlekelwe luhlonzi ngendlela emangalisayo - isiqina ngenxa yamanyathelo athethwe nguhulumende. Ngakho, uthe kuyamangalisa ukuthi kungani amabhizimusi elokhe esala ukuyamukela.
“Ukwenza lokhu akwephuli umthetho kuphela kodwa kuphambana leziqondiso zikahulumende,” kutsho uNcube. “Ngokunjalo, ingatsha zikahulumende lamakhansili bakhunjuzwa ukuthi balandela umlayo kahulumende wokuthi babhadalise ngemali yeZimbabwe.”
Lanxa uhulumende esithi idola leZimbabwe selilohlonzi, usomabhizimusi wakoBulawayo uMnu Aleck Ndlovu utshele iStudio 7 ukuthi bona abakuboni lokhu.
“Idola leZimbabwe selilahlekelwe luhlonzi kakhulu okokuthi alisathengi lutho…Uhulumende uthi abantu kumele balisebenzise kodwa esikubonayo yikuthi ingatsha zakhe lazo zifuna inhlawulo ngedola leMelika,” kutsho uNdlovu.
Uqhubeke wathi, “Kunzima kakhulu ke ukuthi osomabhizimusi babe yibo okuthiwa basebenzise imali engasela sisindo kodwa yena uhulumende elokhe ebenzise idola leMelika; kuzakuba nzima kakhulu, kumele uhulumende akhokhele ngomzekeliso ayisebenzise imali yeZimbabwe ukuze abanye bakulandele khonokho.”
Amazwi kaNdlovu agcizelelwe nguMnu Effie Dlela Ncube, ohlaziya ezombusazwe njalo engumkhokheli wenhlanganiso emela abathengi eyeNational Consumer Rights Association.
“Into ayikhulumayo umphathintambo wezemali uyakwazi ukuthi ayisoze isebenze, yingakho phela lengatsha zikahulumende zingayamukeli imali yeZimbabwe,” kutsho uMnu Ncube.
“Akekho ozayamukela imali ngokuba umphathintambo esethe kumele yamukelwe. Yamukelwa imali ngoba abantu beyithemba, kumele abantu bathembe ukuthi izalondoloza amagugu abo futhi izathenga kusasa.”
Silokhe sikudaba lunye, uSithandekile Mhlanga weStudio 7 uxoxe loMnu. Comfort Muchekeza, isiphathamandla senhlanganiso ebona ngelungelo labathengi eyeConsumer Council of Zimbabwe, ukuze sizwe impumela yokuhlolisisa kwayo ngentengo yempahla ezitolo ebikwa ikhuphuka mahlayana.
Forum