HARARE - Umthethwandaba weHigh Court uthi akumelanga uMnumzana Saviour Kasukuwere ancintise kukhetho lukamongameli ezimele.
UJustice David Mangota wethule isinqumo lesi ngoLwesithathu kulandela ukuphanyekwa kodaba lolu emthethwandaba we-Electoral Court nguMnu. Lovedale Mangwana, owebandlaleZanu PF.
UMangota uthe ukungena kuka Kasukuwere kukhetho luka mongameli kwephula ezinye iziqondiso zomthetho welizwe.
UMangwana ubike emthethwandaba ukuba uKasukuwere ubesehlale okwesikhathi eside engekho kwele Zimbabwe.
Umthetho welizwe uthi kumele wonke umuntu oncintisa kukhetho njalo ovotayo kumele ahlele eZimbabwe okwesikhathi esithile.
Igqwetha lika Mangwana, uAdvocate Lewis, uthi, “Umthethwandaba uveze ukuthi ukwamukelwa kwamaphepha akhe eHarare kwakungekho emthethweni njalo ngenxa yalokho ngeke ancintise kukhetho lokudinga umongameli weZimbabwe.”
Kodwa igqwetha lika Kasukuwere, uNkosikazi Jacqueline Sande, uthi sebezakhweza isicelo sokuphikisa lesi sinqumo emthethwandaba wephezulu.
“Linqume ukuthi khona uSavior Kasukuwere engabi khona kuballot njalo ukubekwa kwakhe yiNomination Court kufakwe eceleni kwathiwa khona bekungalandelanga iConstitution yelizwe njalo thina sithi siyahamba eConstitutional Court siyeluphikisa khonangale njalo asisoze sime ukulwisa size siphumelele.”
Esipha umbono wakhe phezu kokwenzakale emthethwandaba, uMnu. Dlela Ncube, uthi asimangalisi isinqumo lesi.
“Abanengi bethu besisikhangelele ukuthi vele sizaba njalo nxa ulandela esepolitiki lezemithetho kuleli lizwe.”
Kodwa elinye lamagqwetha alodumo, uMnumzana Abraham Mateta, uthi kulusizi okwethulwe ngumthethwandaba.
“Savele saphambanisa ngoNovember 2017 silalele amabutho esitshela ukuthi kwakulama criminals agombolozele uRobert Mugabe ngoba ngumsebenzi wabomahluli ukusitshela ukuthi ama-criminals ngobani. So, ngibona engani yikho okwasuka kwaphambaniseka izinto ama-institutions ethu kawasasebenzi kuhle ngoba savele sehluleka ukulungisa izinto kusukusela ngo2017.”
Umthethwandaba unqume ukuthi akumelanga azwakale nje ekhankasa loba ukukhuluma ngezokuncintisa kukhetho ngoba engenza njalo uKasukuwere uyabe esephula umthetho.
UKasukuwere waphuma elizweni ebaleka ngomnyaka ka2017, ngemva kokugenqulwa libutho kombuso kahulumende owayekhokhelwa nguMugabe.
Wake waphindela ekhaya kodwa waphuma njalo esesiya kwele South Africa lapho ahlala khona okwamanje.
Forum