HARARE - Kulowesifazana oncintisa kukhetho lwamakhansila osebaleke emzini wakhe kulandela ukuhlaselwa ngabacatshangelwa ukuba ngabalandeli bebandla leZanu PF. Lokhu kwenzakala ngesikhathi uMongameli Emmerson Mnangagwa esithi kumele kuqhutshwe ukhetho olukhululekileyo lonyaka.
UNkosazana Catherine Chandiwandirira, oncintisa kuWard 8 eHunyani emele ibandla leCitizens Coalition for Change, uthi abantu laba batshise impahla emzini wakhe bamethusela ukuba bazambulala engekela ukusuka esigabeni lesi.
"Angenelisanga ukuya endlini. Sifuna ukuthi sivikeleke. Kunje abantwana omunye ukwenye indawo omunye ukwenye. Abantwana balala ezindlini zabantu."
Ukuhlukunyezwa kuka Nkosazana Chandiwandirira kuza ngesikhathi abacatshangelwa ukuba ngamalunga ebandla leZanu PF bethwalise nzima amalunga eCCC. UMnu. Lovemore Chinoputsa, oncintisa kukhetho lwamalunga edale lephalamende eHunyani, uthi bakhathazekile ngokwehlele omunye wabo.
" Sibona ukuba izolo abantu be ZANU PF babuthene endlini yakhe befuna ukubhidliza indlu yakhe. ABantu be ZANU PF babuthene endlini yakhe besithi kasuke ngoba engowe CCC.”
Ummeli webandla ZANU PF eHunyani, uMnu. Tongai Mnangagwa, uphikile ukuba abasekeli bebandla lakhe yibo abenze udlakela lolu.
"Akulanto enjalo. Engincintisana labo ngabanawami, okhumbula labanye. Balamabhizimusi endaweni yakithi."
Asenelisanga ukukhuluma ngodaba lolu lesikhulumeli samapholisa, uAssistant Commissioner Paul Nyathi, obengaphenduli umakhalekhukhwini.
Kulabalandeli bebandla leCCC abasanda kutshaywa eChiredzi, Zhombe, Gokwe, Silobela lezinye indawo ngabacatshangelwa ukuba ngamalunga eZanu PF.
UNkosikazi Prisca Dube, ofundisa izifundo zombusazwe eUniversity of Zimbabwe, uthi kumele amabandla ezombusazwe akhulumisane njalo asebenze ngokuthula ngesikhathi sokhetho.
“Kumele begcine ukuthula bengabi ngabantu abatshayanayo. Ngithole ukuthokoza sibona umlandeli we CCC engena emva kwemota ye ZANU PF, yikho esikufunayo."
Kulonye udaba, amalunga enhlanganiso yeZimbabwe National Students Union ababotshelwa ukuloba emidulini yezakhiwo zikahulumende besithi kumele kukhululwe uMnu. Job Sikhala loMnu. Jacob Ngarivhume bahlawuliswe isibambiso sebail ngoMvulo ngumthethwandaba.
UEmmanuel Sitima, Tawanda Watadza loLionel Madamombe bafunda eUniversity of Zimbabwe njalo behluleka ukuloba imihloliso yabo ye-semester yesibili ngemva kokubotshwa lokhu. Omela abafundi, uBenon Ncube, uthi lobanje bethokoza ngokukhitshwa kwabafundi laba ejele, bekungamelanga bebotshwe.
"Sijabulile ngemva kokukhitshwa kwabo kungacaci ukuthi boneni. Uhulumende uzama ukwethusela abantu ukuba bengenelisi ukubotshwa lapho ehluleke khona. Uhulumende kafuni simkhuze lapho esehluleka."
Besebelenyanga ezimbili bevalelwe enkambeni yamapholisa bemelele ukuthoniswa amacala abawetheswayo.
Kolunye njalo udaba, uMnu. Harrison Nkomo, igqwetha elimela ofuna ukuncintisa kukhetho, uSavior Kasukuwere, uthi udaba lokuba uKasukuwere angancintisa kukhetho olwaphawulwa yi-High Court luzathoniswa kusasa lidale leSupreme Court.
Forum