WASHINGTON - Bayakhala abakumabandla aphikisayo kulandela ukupasiswa komthetho we-Criminal Law Codification and Reform Amendement Act nguMongameli Emmerson Mnangagwa.
Bathi umthetho lo, owaziwa nguzulu ngokuthi yiPatriotic Act, kumele ulahlwe kungangena ibandla eliphikisayo embusweni kulandela ukhetho oluzaqhutshwa ngoNcwakazi lonyaka.
Umthetho lo walela abadabuka eZimbabwe ukuba beqhube imihlangano lezizalwane zakwamanye amazwe lapho okukhulunywa ngokujezisa eleZimbabwe.
Otholakala elecala lokwephula esinye isiqa somthetho lo, ulakho ukuvalelwa entilongweni okweminyaka engamatshumi amabili – 20 years.
Ulakho njalo ukulahlekelwa yikuba yisizalwane sakwele Zimbabwe, okubizwa ngeSilungu ngokuthi yi-citizenship.
UMnu. Prince Dubeko Sibanda, umgcinisihlalo webandla leCCC eMatabeleland North, uthi umthetho lo wephula ilungelo likazulu.
Kodwa uMnu. Mlungisi Moyo, ilunga lebandla leZanu PF, uthi uqondile umthetho lo.
Forum