BULAWAYO - Owadlalela iqembu leBulawayo Wanderers, uBishop Moyo, uzitshaya isifuba ngamadodana akhe alandele enyaweni lwakhe acina esedlalela amaqembu amakhulu eZimbabwe.
UBishop Moyo ukhulele eNjube koBulawayo lapho adlala khona ibhola labadlali abalodumo ababalisa uRahman Gumbo loRichard Ndlovu. Ufunde eMtshede kanye leMpopoma lapho adlale khona labanye abadlali abalodumo abagoqela uAlexander Maseko.
“Ngithe ngiqeda isikolo ngayadlalela iBulawayo Wanderers, sidlala labo Maplane Nyathi, Majuta (Mpofu), Charles Wadawu, Eddie Zimunya, Noel Nyoni, Ronnie Maseko, Stanford Ntini, uElvis Chiweshe samthatha kuZOC, Lazarus Mwambopo samthatha eHwange, sasilabadlali abalaziyo ibhola ababalisa uVictor lo Peter Moonsamy. Sasidlala ibhola elimnandi kabi elalibukwa yiZimbabwe okokuthi sasisithi nxa sidlala labo Highlanders abantu babekholisa kakhulu.”
UMoyo nguyise kaThabani, owadlalela amaqembu abalisa eleHighlanders kanye leleHow Mine, kanye lamawele uElvis lo Kelvin, bona abadlalela iqembu leDynamos. Uthi laye ebutsheni bakhe kwasala kancane ukuba adlalele iqembu leDeMbare.
“Kulesikhathi engahamba ngayahlala eHarare ngisiyafunda. Ngadlalela iqembu elalithiwa yiAirport eyayikuDivision One. Ngalesosikhathi ngangizilolonga leqembu leDynamos isadlalelwa ngabadlali ababalisa uGeorge Shaya, uKuda Muchemeyi, uShadrack Ngwenya kanye labanye. Babefuna ukuba ngilidlalele iqembu leDynamos manje ngasengithole umsebenzi eTV Sales and Hire njalo abelungu bami bathi awusabuyeli eHarare. Ngangifuna sibili ukudlalela iDynamos kodwa ngacina ngiphenduka ngizodlala kuEagles.”
UMoyo uthi kuyamjabulisa ukuba amadodana akhe amfuzile njalo amabili enelise ukudlalela iqembu leDynamos yena angazange eyenelise ukulidlalela.
“Ngiyathokoza ukuba abafana bami badlalela iDynamos. Batshaya ngenxele njengami njalo badlala kuhle kakhulu. Bake badlalela iqembu leFC Platinum okweminyaka eyisikhombisa, basuka lapho baya kuChippa, ngemva kwalokho uKevin waya eZambia. Kukhanya abantwana bafuze ubaba. Ibhola vele ngiyalithanda njalo lobaba wami wayevele elithanda edlalela iTsholotsho.”
UMoyo uthi umehluko okhona ebholeni lakulez’insuku lelakudala yikuba kulezinsuku akusela abagadli ababukhali.
“Ibhola lakudala lalikholisisa kulelakhathesi njalo ngokubona kwami imbangela yikuba kulokupasana okunengi ebhokisini. Thina kudala sasitshaya sikhatshana ibhola liyengena. Ngicabanga ukuthi nxa singalungisisa khonapho umdlalo wethu ungaphakama kakhulu.”
Ngesikhathi esadlala uMoyo ubengumgadli kodwa uthi ubesenelisa lokudlala lasemuva njengalokhu okwakusenza amadodana akhe angamawele uElvis kanye loKelvin ngesikhathi besakhula ikanti uThabani yena ubengumgadli odlale waze wayadlala laselizweni laseCyprus.
Forum