UMaplane Nyathi, owadlalela amaqembu abalisa eleBulawayo Wanderers, eleZimbabwe Saints kanye leleHighlanders, uthi umdlalo wenguqu awusakhwabitheki njengakudala.
UNyathi uthi izinga lomdlalo wenguqu edlalwa khathesi seliphansi kakhulu okokuthi yena uvele akasazihluphi ngokulandelela imidlalo.
“Iqiniso lihle sibili ibhola lakithi kangisalilandeli. Lanxa ngisiyazibukelela ngibukela abafana beEast Rovers lapha engihlala khona. Ukuthi ngingayigadela ngisithi ngiyaphi hayi ngiyabe ngiqamba amanga. Hayi ibhola kalisaqinanga, yikho sesizibukelela kumabonakude.”
UNyathi uqale ukudlala ibhola eMtshede njalo ubengumuntu obesenelisa ukudlala endaweni ezitshiyeneyo enkundleni.
“Ngaqalisa ngidlala unumber 11 loba kwakungayisikho ukuba ngitshaya ngenxele kodwa kwathi kuswelakele umuntu otshaya ngenxele ngafakwa khona ngoba mina ngangitshaya ngazo zonke inyawo. Ngasuka lapho ngayadlala unumber 10 owacina ethethwe nguMoses Moyo mina ngaya kunumber 8, yikho lapho engaphelela khona kodwa lasegedini ngangibamba nxa unozinti wethu engezwa kuhle. Ngikhumbula ngelinye ilanga sidlala leBulawayo Callies sadlala sanqoba kuyimi engisegedini.”
UNyathi udlale isikhathi eside kuqemmbu leBulawayo Wanderers lona elatshintsha laziwa ngegama elithiwa Eagles kodwa uke wadlalela njalo amaqembu abalisa eleZimbabwe Saints kanye leleHighlanders.
“Ukuze bangithathe babengilanda emsebenzini. Ngizabona bona abeSaints ngiphinde ngibone labo abeHighlanders futhi sebengilande emsebenzini ngisebenza eRadiator and Tinning. Owayengithatha ngulowo oyabe esegedini ahle angihluthune angifake emoteni. Ngacina ngisiyadlala kuMashonaland United kodwa ububi bakhona yikuthi angiqedanga isizini kuyo. Isizatho ngingasitsho kodwa lizathi ngilobandlululo kodwa yikuba kwasuka kwangathi kuyakhethwana ukuba lowu uyilokhu lami ngacina ngingasadlali ngikhululekile yikho sehlukana leZimbabwe Saints. Ngasengithathwa nguSilas Ndlovu ngayadlala kuHighlanders ngidlala laboBarry Daka kanye labo Majuta (Mpofu).”
UNyathi uthethe umhlalaphansi esebuyele kuqembu leEagles lapho adlale khona labadlali ababalisa uMaximillion “Boy” Ndlovu kanye labanye.
Forum