Taboka Ncube
Abasakhulayo bathi abesabi lutho njalo baledlabuzane lokuphatheka ngokugcweleyo kukhetho lokudinga umongameli, amalunga epalamende kanye lamakhansela ngolwesithathi.
Intsha ithi iledlabuzane lokuba phakathi kwabantu abazakhetha inkokheli zelizwe ezigoqela abatsha abadinga ukuvotelwa ezikhundleni zamakhansili lakuphalamende.
UNkosazana Sithabile Gandi oseZimnyama eMangwe uthi intsha izasukuma ngobunengi ngoLwesithathu.
“Ulutsha lukhululekile, lokhu kubangelwa yikuthi amaparty atshiyeneyo abhoda ekhankasela ukuvotelwa. Abatsha baledlabuzane ikakhulu labo abaqala ukuvota esibathi ngama-first-time voters,” kutsho uNkosazana Gandi.
UMnumzana Mlungisi Zhaneiro, owebandla leCitizens Coalition for Change eHwange Central, uthi abasakhulayo balenjabulo enkulu ngenxa yethuba lokuvota abalitholileyo. Uthi bazakuyavota njalo bavikele ivoti yabo.
“Siyajabula nge-outcome esiyibona kuma-election la, lonyaka kutshengisela ukuthi amayouth amanengi abambene njalo afuna inguquko. Abasakhulayo baphume ngobunengi besiyabhalisa ukuvhota ngoba bafuna inguquko,” kutsho uMnumzana Zhaneiro.
UMnumzana Moses Langa, umgcinisihlalo wabasakhulayo bebandla leZanu-PF ezansi yemaNdebeleni, uthi abasakhulayo abalakwesaba njengoba kungela dlakela olwenzakalayo.
“Njengabasakhulayo esabelweni seMat South sikhangelele ukuvota ngobunengi. Ungakhangela abasakhulayo bethu banengi njalo bebebuya bebanengi emihlanganweni esiyenzileyo,” kutsho uMnumzana Langa.
Ekhuluma leStudio7, ekoBulawayo uNkosazana Ropafadzo Gava, osekela ibandla leCCC, uthi loba abantu bengahlalisekanga bengazi ukuthi kuyini okungenzakala ngalesis’ikhathi sokhetho, intsha izinikele ukuphatheka kulolukhetho.
“Njengama-CCC sikhangelele ukuthi sizanqoba, sibe lomongameli omutsha. Izolo kurally bekulabantu abanengi kakhulu kungaphiwa ukudla, okutshengisa ukuthi abantu bazinikele kunguquko,” kutsho uNkosazana Gava.
Kukhangelelwe ukuthi abasakhulayo bazavota ngobunengi ngoLwesithathu.
Forum