Ibandla eliphikisayo eleCitizens Coalition for Change lithi kumele eleZimbabwe liqhube ukhetho olutsha lincediswa ngabenhlanganiso ezinjenge Southern African Development Community, African Union lezinye, ukuze kuqedwe ukufuthelana okuselizweni ngenxa yempumela yokhetho.
Kodwa abeZanu PF bathi abebandla eliphikisayo babanga umsindo nje.
Lokhu kuvezwe ngumsekeli wesikhulumeli seCCC, uMnu. Ostalos Gift Siziba emhlanganweni lentathelizindaba owenzelwe eHarare.
Kodwa abeZanu PF bathi lokho yikudlala ngesikhathi sabantu njengoba ukhetho solwenziwe lwadlula, kwanqoba uMongameli Emmerson Mnangagwa.
Umqondisi obona ngokwethulwa kwemibiko kuZanu PF, uMnumzana Farai Marapira, uyakusekela lokho.
Abenhlanganiso ezimeleyo ebihlola ukuqhutshwa kokhetho eyeCivic Society and Churches Joint Forum bathi basuthisekile ukuba lolukhetho luqhutshwe ngendlela ngakho akula sizatho sokuba kuqhutshwe olunye njalo.
Obekhokhela iqula lalenhlanganiso, uNkosikazi Abigail Mupambi, utshele intathelizindaba eHarare, namuhla ukuba okusalayo yikuba abantu basebenzisane.
Lokhu kusekelwa nguMfundisi Angliston Sibanda okunhlanganiso le, othi osekudingakala yikuba inhlangothi zombili zisebenzisane ukuthuthukisa ilizwe hatshi ukube lokhe kudonselwana.
Umsekeli kamgcinisihlalo weZEC, uMnumzana Rodney Kiwa, utshele intathelizindaba ngaphambilini ukuthi ikomishini yakhe iqhube kahle ukhetho lolu kungelani lenkinga ezimbalwa zokuphuza kwamaphepha okuvota endaweni ezinjenge Harare, Bulawayo leManicaland.
Ukhetho olweZimbabwe lusolwa ngabenhlanganiso ezinjenge SADC, African Union, COMESA, European Union, uhulumende weMelik lezinye.
Lanxa impumela yalolukhetho isolwa ngabanye, kuleyinye inkokheli yamazwe awezwekazi le Africa, ezinjengo Mongameli Cyril Ramaphosa wakwele South Africa, uMongameli Samia Suluhu Hassan wakwele Tanzania labanye asebethumele amazwi okutshayela ihlombe uMnangagwa ngokunqoba kulolukhetho.
Forum