Umqeqetshi weqembu labesilisa elimela iZimbabwe, emdlalweni wenguqu uBaltemar Brito useveze ithemba lokuthi amaWarriors azaqhuba kuhle emdlalweni walo leleRwanda kusasa emini.
Ekhuluma phezu komdlalo wesibaya sikaGroup C ozaqhutshelwa enkundleni yeHuye khonale kweleRwanda kusasa emini, uBrito uthe sebehlome baphelela njalo amalungiselelo abo ahamba kuhle.
“Siyakwazi ukuba iqembu leRwanda lidlala njani ngemva kokubukela imifanekiso yalo lidlala njalo silengcwethi ecubungula umdlalo wenguqu esiyiphiwe yikhomithi eqondisa umdlalo wenguqu kweleZimbabwe.
Sekungenzeka kodwa ukuba bantshintshe okuthile yikho lathi kumele sibe lawethu amaqhinga azakwenza labo bedideke ukuba kuqhubekani ngathi,” kutsho uBrito.
UBrito uqhubekele phambili wathi abadlali yibo okumele badlale ngokuzimisela okukhulu ngoba isikhathi sokulungiselela imidlalo yeqembu lesizwe sisifitshane.
“Siyakholwa kukho konke ebesikwenza silungiselela lumdlalo njalo sisebenze kuhle labadlali kodwa bona yibo okuzamele badlale ngenhliziyo yonke ngoba isikhathi sokulungiselela umdlalo sisincane. Sikubonile ukuba baze lapha ngoba beziqhenya ngelizwe labo njalo bazimisele ukulilwela,” kutsho uBrito.
Umdlali odlala eseNgilandi uMarvelous Nakamba laye ugcizelele ukuba bona njengabadlali kuzamele bebophe ziqine ukuze baphumelele.
“Sesilinde ukuqala kwawo umkhankaso njalo siqala ngawo umdlalo wethu leRwanda. Sizathatha umdlalo ngamunye ngamunye njalo siyazi imidlalo yeqembu lesizwe yehlukile kulemidlalo yamaqembu yikho lathi njengabadlali siyakhuthazana ngesikhathi sizilolonga ukuthi senze kuhle siphakamise ilizwe lethu,” kutsho uNakamba.
Ilizwe leZimbabwe likusibaya sikaGroup C kumkhankaso wokudinga amaqembu awezwekazi laseAfrica azakuyaphatheka kumncintiswano wezizwe zomhlaba ndawonye leBenin, Lesotho, Nigeria kanye leSouth Africa.
IZimbabwe izadlala leNigeria emdlalweni walo wesibili ngeSonto ezayo njalo lumdlalo lawo uzaqhutshelwa khonale kweleRwanda njengoba ilizwe leZimbabwe lingela inkundla elungele ukuba ingadlalelwa imidlalo yezinga laphezulu.
Forum