Ugatsha lukahulumende olubona ngezokulima olweAgritex luthi indlala isibulele inkomo ezedlula inkulungwane ezintathu, 3,000, eMatabeleland South kuthi ezedlula inkulungwane ezingamakhulu amathathu, 326,000, lazo zisengozini yokufa.
Isiphathamandla seAgritex, uMnu Zondani Muchemwa, wethule umbiko othi iziqinti zeMangwe, Bulilima, Gwanda kanye leMatobo yizo ezihlaselwe kakhulu yindlala lapho osekufe khona inkomo ezinengi.
Ezinye zifa ngesikhathi zizala kuthi ezinye zibanjwa ludaka emadamu asesitsha zidinga amanzi.
EBulilima sokufe ezedlula inkulungwane, 1,134; eMangwe 891, eGwanda 628 kuthi eMatobo sokufe ezilikhulu elilamatshumi amabili, 120.
EMzingwane sokufe ezingu 147, eInsiza 144 kuthi eBeitbridge sekufe ezingamatshumi amabili lane, 24.
Kodwa izakhamizi zithi amanani la aphansi kakhulu ngoba endaweni ezinengi sezihlinza inkomo ezicubayo mihla ngemihla.
UMnu Obert Tshuma oyisakhamuzi seMatshiya eGwanda North uthi, "Isimo sezifuyo sesisibi kakhulu ngoba sezisiwa, amanzi kawasekho, ukudla akusekho ngakho inkomo seziqalisa ukuwa kathesi."
Amazwi kaTshumi asekelwe nguSobhuku weMasholomoshe eGwanda North uMnu Lovemore Ndlovu.
"Inkomo ziyafa ngenxa yendlala lamanzi kawakho, kulenkomo ezimithiyo zingalala kazivuki, abantu sebelinda emadamu ukuze babone lapho ezibanjelwa khona ngoba amanzi aluhlupho," kutsho uNdlovu.
UNkosikazi Sithabile Moyo odabuka eMbombela eMatshetsheni yena uthe, "Inkomo sezicuba, njengalezi ezimithiyo ezinengi ziyavuswa sezisindwa ngamathole… ngapha kuboNkazhe vele inkomo sezisiwa."
Ngaphandle kodubo lwamanzi ezifuyo uMaMoyo uthi abantu labo babhekane lendlala embi kakhulu ngoba izilimo zabo esivandeni seSoMhlanga sezitshile.
Uthe: "Sibalenkinga nxa izulu lingekho, sesiphongucela kuNkulunkulu ukuthi asihawukele izulu line izilimo zethu zivuthwe. Phela indlala inkulu lokungabantwana asikwazi ukuthi sizakugcina ngani."
UNkosikazi Sithabile Tshuma oweMatshiya uthe labo sebebhekane lodubo lwamanzi.
"Ayasihlupha amanzi sikha labanye abeMbombela laphetsheya komgwaqo kuboGiye laboMgoli Dube. Yibo esihlangana labo ngoba izikotsho zabo zafa, lesikotsho seMatshiya amanzi akhona kuthwa akhiwa ngababalisi kungakho sihlangana la edamu sizokukha amanzi futhi amanzi akhona kavikelekenga," kuchasise uMaTshuma.
UMnu Muchemwa ukhuthaze abafuyi benkomo ukuthi bathengele inkomo zabo isikuba kumbe ukudinga utshani kwezinye indawo ukuze bazihlenge.
Inkomo eMatabeleland South zidlula inkulungwane ezingamakhulu ayisithupha 659,137.
Forum