Uhulumende ubikwa esedinga ukuthwalisa nzima izisebenzi ezivele zithwele nzima ngokuphinda ahlephune einye ingxenye yokuliholo ezikutholayo isiya kwesinye isikhwama asefuna ukusibumba. Uhulumende usesungula uhlelo kumbe isikhwama semali ethiwa yi National Health Insurance oluzaqhutshwa yinkampani ye National Social Security Authority i NSSA, lapho izisebenzi zonke zizabanjelwa isilinganiso sokuhlanu ekhulwini 5% seholo lazo, kuthi labaqhatshi bakhiphe eyinye njalo i 5%.
Uhlelo lolu lukhangelelwe ukuqalisa ngoNtulikazi (July). Phansi kwaloluhlelo imali ezabuthaniswa yisikhwama se NSSA leso, yiyo esizasetshenziswa nguhulumende ukuthenga imithi ezibhedlela kuthi yena abe ngosekhangelane lendleko yemiholo yezisebenzi zezibhedlela.
Kodwa inhlanganiso yezisebenzi i Zimbabwe Congress of Trade Unions i ZCTU iyalisola kakhulu leli nyathelo isiithi le ngeyinye yendlela esifuna ukusetshenziswa nguhulumende ukuntshontshela izisebenzi ezivele zihola imali ephansi.
Isikhulumi se ZCTU uNkosazana Khumbulani Ndlovu sitshele u Brenda Moyo we Studio 7 ukuthi khathesi baphakathi kokukhulumisana lokucebisana lezisebenzi elizweni lonke jikelele anduba baphume lezinqumo ezikhangelelwe ukuvimba uhlelo lukahulumende lolu.