USibalukhulu weBhanga elikhulu lelizwe uMnu Gideon Gono lamuhla usole iziphathamandla zikahulumende esithi ezinye zazo yizo ezivimba inthuthuko yenotho yelizwe.
UGono uveze lokhu esethula iMonetory Policy yakhe yakuqala yalonyaka. UGono uthi inhlelo ezinengi ezigijinyiswa ngabezombusazwe kazilungelanga impumelelo yezenotho kuleli njalo uthi kulobuhuquluzi obunengi kakhulu obenziwa yiziphathamandla zikahulumende.
UGono, obekhangelelwe ukwehlisa amandla emali yakuleli okusemthethweni lamuhla uthe kasoze akwenze lokhu ngoba kuyabangela futhi ukuthi abantu bonabo athi kabethembeki kwezenotho baqhubekele phambili njalo sebethola inzuzo enengi ngokwenza imicimbicimbi yabo.
Ebamba udaba lwamatshe aligugu agoqela idayimana kanye legolide olukhanya soluhluphile kuleli uGono uthi kuliqiniso ukuthi bakhona abantu abemba lawamatshe basuke beweqise imincele okungekho emthethweni beyewathengisa kwamanye amazwe.
Uthi uhulumende kumele abone ukuthi idayimana eliseMarange eMutare lenjiwa ngendlela efaneleyo njalo esemthethweni ezakwenza ilizwe lalo lithole inzuzo kulokhu hatshi abantu nje abambalwa.
UBabongile Dlamini usipha loludaba.