amalinks wokungena

Breaking News

Ibandla Le ZANU PF Lingabe Lifuna Ukuqilibezela Ku Khetho Yikho Ifuna Lwenziwe Ngo 2010 Mnyakamunye Lemidlalo Ye World Cup E South Africa


Ibandla elibusayo le ZANU PF lithi liyaqhubeka ngamalungiselelo okumanyanisa ukhetho lokudinga umongameli, amalunga edale lepalamende lawe senate lwenziwe ngomnyaka ka 2010.

Isikhulumi sebandla le ZANU PF u Mnumzana Nathan Shamuyarira utshele umsakazo we Studio 7 ukuthi ibandla leli liphakathi kokudinga umbono wamalunga alo elizweni lonke jikelele phezu kwaloludaba, esithi idale laphezulu lebandla ele Central Committee luzahlangana ngenyanga ezayo luhluzisisa okuyabe kuvele ezigabeni zelizwe.

U Shamuyarira uthi okuzalandela yikuthi kuguqulwe isisekelo sombuso kusikhatshana esilandelayo, kodwa waphanga watsho ukuthi kakusoze kwenziwe okuthiwa yi Referendum ngesingisi ukuthi izizalwane ze Zimbabwe ziphiwe ithuba lokuvuma kumbe ukwala lokhu.

Kodwa amabandla aphikisayo lenhlanganiso ezizimeleyo aseqalisile umkhankaso wokuvimba i ZANU PF ukuthi idlulisele phambili lolukhetho.

Ingcwethi zombusazwe zithi okumangalisayo yikuthi iZANU PF isidinga ukuthi ukhetho lwe Zimbabwe lwenziwe nyakana kusenziwa imicintiswano yemidlalo yenguqu yenkezo yomhlaba eye World Cup e South Africa eyenziwa ngo June 2010.

Zisithi ngalesisikhathi kutsho ukuthi umhlaba wonke awusoze uzihluphe ngokuzabe kusenzakala e Zimbabwe kodwa uyabe ubhekise imbobo emidlalweni le, okungapha i ZANU PF ithuba lokucatsha ngayo limidlalo lihlukuluze abaliphikisayo lokuqilibezela kakhulu kulolukhetho, lisazi ukuthi umhlaba uyabe ungalubhekana lolu khetho ngamehlo abomvu.

U Mnumzana Zenzo Nkomo yingcwethi kwezombusazwe elilunga le Communist Party ye South Africa. U Nkomo utshele u Brenda Moyo we Studio 7 ukuthi yebo siyawabona amaqinga eZANU PF kodwa umbuzo oqakathekileyo ngothi amabandla aphikisayo azilungiselele na ukuncintisa okuzwayo kukhetho ngo 2008 kumbe ngo 2010.

Ezinye Indaba Ze Studio7..

XS
SM
MD
LG