Umgcinisihlalo weZimbabwe Action Support Group uMnumzana Remember Moyo usexwayise uMongameli Robert Mugabe lebandla lakhe ukuthi bangalokothi ukudlulisela phambili ukhetho ngo 2008, ngoba bazakwehla begijima esihlalweni sombuso.
Ekhuluma lamalunga enhlanganiso yakhe kanye labasekeli beMDC, emhlanganweni wokuqoqa amaZimbabwe oqhutshelwe emaphandleni eSpruit kwelomzansi Africa, uRemeber Moyo uthe intambo zombuso kufanele zibe sezisezandleni zikahulumende lomongameli omutsha kungakafiki u-2010. Uthi IZANU PF ingaqali ukusithathela phansi leso sixwayiso ngoba ngeke libuseke elikaMzilikazi nxa lokho kungenzakalanga.
UMoyo ukhwaze ngolaka inhlanganiso zeZimbabwe ezikwele South Africa eziphiwa imali yokusebenzisa emzabalazweni weZimbabwe kodwa beseziyisebenzisa ukuphuza uhololo, utshwala, ukuthenga izimota lokulala emahoteleni. Ngokutsho kukaMoyo amalunga enhlanganiso yakhe azozivala lezo nhlanganiso kusale kuphela ezizimisele ukusebenzela usapho lweZimbabwe.
Lamazwi abuye agcizelelwa ngumgcinisihlalo weMDC ekhokhelwa nguMnumnzana Tsvangirai ePitoli, uMnumnzana Lovemore Chikandiwa yena othe intsha yeZimbabwe kwele South Africa, isizimisele ukwenza loba yini ukuze iZimbabwe ikhululeke.
UBenedict Nhlapho usipha loludaba eseJohannesburg kwele South Africa.