Iinhlanganiso ebona ngokuqhutshwa komdlalo kakhilikithi elizweni eye Zimbabwe Cricket ibikwa isisebenzisa imigoqo ethize ukuze yenqabele ukubalekelwa ngabadlali.
Kulemibiko ethi i ZC kuthange itshele abadlali ukuba bonke abakuqembu lakuleli elizaphatheka kumidlalo yomhlaba wonke ngenyanga ezayo ngase West Indies kumele balobelane layo izivumelwano zomsebenzi ezitsho ukuba bazasebenzela i ZC okweminyaka emibili njalo yaquma yathi ongavumelani lalokhu akasoze adlalalele leliqembu kumncintiswano we World Cup.
Iqembu labaleminyaka ephansi kwamatshumi amabili lantathu elimela isizwe emdlalweni kanobhutshuzwayo kusasa lizadibana labosowabo base Mozambique inengi likhangelele ukuba lawa majaha asebenzise ithuba lokudlala besekhaya ukuze banqobe kuhlandla lakuqala lemidlalo yokudinga amaqembu azaphatheka kumidlalo yamazwe akuzwekazi le Africa eye All Africa Games ezaqhutshelwa ngase Algeria phakathi kwalonyaka.
Inkokheli yomdlalo we Basketball kuleli ilethemba lokuba amaqembu akuleli azafinyelela ukuyaphatheka emidlalweni yalonyaka eyezwekazi le Africa ngemva kwemidlalo yokudinga amaqembu azamela lesisigaba sasezansi yase Africa ezaqhutshelwa kuleli kusukela ngomvulo.
Intathelizindaba yethu yezemidlalo u Joseph Njanji usipha loludaba ndawonye lezinye.