Owayengu nobhala jikelele webandla leZanu PF, njalo engomunye wabasungula lelibandla, uMnumzana Edgar Twoboy Tekere usephunde waxotshwa njalo ebandleni leZanu PF.
UMnumzana Tekere, owake waxotshwa ngemva kokusola uMongameli Robert Mugabe wasungula elakhe ibandla, ele ZUM, usexotshelwe ugwalo lwakhe aanda kululoba olulesihloko esithi "A Lifetime Of Struggle".
Lolugwalo luveza uMongameli Mugabe njengegwala elingazi ezempi. U Tekere uthi njalo egwalweni, lwakhe, olubikwa luthengwa njengamafat cook, nguye owanxusa uMongameli Mugabe ukuthi angene kwezombangazwe.
Yena uMugabe watshela umhlangano webandla lakhe ukuthi uMnumzana Tekere uqamba amanga njalo ungumuntu obulawa ngumkhuhlane wengqondo. Emhlangweni owenzelwe eMutare ngempelasonto esigabeni seManicaland, lapho okudabuka khona uMnumzana Tekere, kunqunywe ukuba uMnumzana Tekere akaxotshwe.
Kodwa owalwa impi yenkululeko ekhokhela inhlanganiso ye Zimbabwe Liberators’ Peace Initiative, uMnumzana Max Mnkandla utshele uChris Gande weStudio 7 ukuthi bekungamelanga uMnumzana Tekere axotshwe.