Ezinye iziphathamandla zebandla le MDC elikhokhelwa nguMnumzana Morgan Tsvangirai ebezilalisiwe esibhedlela se Avenues Clinic e Harare ezigoqela oMnumzana Nelson Chamisa, uTendai Biti, uGiles Mutseyekwa kanye lomgcinisihlalo we NCA, uMnumzana Lovemore Madhuku zikhutshiwe lamuhla esibhedlela ukuthi ziye emakhaya azo.
Lokhu kulandela ukutshaywa kakubi ngamapholisa kwamalunga eSave Zimbabwe Campaign agoqela lezi ziphathamandla bezama ukuya embuthanweni weZimbabwe Grounds emzini weHighfields eHarare.
Osaphethe isikhundla sika Mongameli wecele le MDC elikhokhelwa nguMnumzana Morgan Tsvangirai, uNkosikazi Thokozani Khuphe utshele uSithandekile Mhlanga weStudio 7 ukuthi ezinye iziphathamandla ze MDC ezigoqela uNkosikazi Sekai Holland lo Nkosazana Grace Kwinjeh zilokhu zisebbuhlungwini obesabekayo.
Amalunga ecele leMDC elikhokhelwa nguMnumzana Morgan Tsvangirai abotshwe izolo koBulawayo akhululiwe lamuhla. Amalunga la alitshumi lane abalisa uMnumzana Sam Sipepa Nkomo, umfowabo kamgcinisihlalo weZANU PF loMnumzana Reggie Moyo ongumgcinisihlalo njalo wenhlanganiso edinga isisekelo sombuso esitsha, iNCA, koBulawayo babotshwe izolo ntambama ehofisini ka. Nkomo.
Igqwetha labo, uMnumzana Kucaca Phulu, uchasisela uChris Gande weStudio 7 okunengi ngaloludaba kulingxoxo.