Namhlanje umthethwandaba we High Court unike u Nkosikazi Sekai Holland lo Nkosazana Grace Kwinje imvumo yokuthi bayekwelatshwa phandle kwelizwe. Ngesonto edluleyo ababili laba baliswe ukuphuma elizweni ngamapholisa kahulumende asebenza nsitha ama CIO sebesegcekeni lendizamtshina e Harare. Ababili laba babuyiselwe esibhedlela se Avenues lapha akade belindwe khona ngamapholisa. Umthethwandaba uhle wathe ababili laba babuyiselwe incwadi zabo zokuhambisa.
Kunjalo nje u Mongameli welinye icele le MDC u Mnumzana Arthur Mutambara laye othathelwe incwadi yakhe yokuhambisa i passport, i cell phone kanye letikiti lakhe lendizamtshina, ulokhe engakakubuyiselwa. Kodwa ubekhangelelwe ukubuyiselwa lezizinto namhla ntambama ngemva kokubana amagqwetha akhe u Nkosikazi Beatrice Mtetwa lo Mnumzana Harisson Nkomo sebekhweze loludaba emthethwandaba.
Ingcwethi kwezombusazwe zithi ukuhlukuluzwa kwenkokheli yamabandla aphikisayo, eye nhlanganiso ezizimeleyo, lozulu nje jikelele nguhulumende ka Mongameli Robert Mugabe kungabe kuliqhinga lika Mugabe lokwethusela labanye asebemphikisa kubandla le ZANU PF. U Mnumzana Gorden Moyo umqondisi we Bulawayo Agenda utshele u Brenda Moyo we studio 7 ukuthi abantu be Zimbabwe khona bezabona ulunya luka Mugabe oqhubeka ebahlukuluza lokubabandezela, ngoba efuna ukufela esikhundleni.