amalinks wokungena

Breaking News

UMwanawasa Usola uMugabe Ngocuku Aphethe Ngalo Uzulu WeZimbabwe


UMongameli Levy Mwanawasa weleZambia usole kakhulu inkokheli yamazwe ezansi ye Africa, iSADC, esithi kumele iphumele egcekeni ngokusola umbuso kamongameli Robert Mugabe.

UMwanawasa nguye yedwa umkhokheli welizwe elakhelane leZimbabwe osephume egcekeni esola umbuso kamongameli Mugabe. Amanye amazwe aphetsheya aqhubekele phambili elokhu esola okwenzakalayo eZimbabwe, ikakhulu uchuku lokwephula ilungelo loluntu olwenzakalayo elizweni.

Inhloko kahulumende yeBhilitane, uMnu. Tony Blair, utshele idale lephalamende lelizwe lakhe ukuthi impela amazwe anjenge South Africa kumele aphumele egcekeni asole ukutshaya lokuhlukuluza okwenziwa inkokheli yenhlanganiso ezilembono ehlukene leyakhe. Omela iMelika eZimbabwe uMnu. Christopher Dell useBhilitane lapho abikwa ubelomhlangano wokuhluza udaba lweZimbabwe.

Kunjalo nje, sekuphinde kwafa njalo omunye otshaywe ngamapholisa ngeNsonto enkundleni yeZimbabwe Ground embuthathweni obu qoqwe ngumanyano we Save Zimbabwe Campaign. Isihlobo sikamuyi, uItayi Manyeruke obeleminyaka engamatshumi amathathu esingafunanga ukuqanjwa igama sisesaba ukuhlukuluzwa ngamapholisa sitshele iStudio Seven ukuthi uManyeruke bebemdinga kusukela ngeNsonto iviki edluleyo bengazi ukuthi ungaphi baze bathola isidumbu sakhe emotsha yesibhedlela se Gomo ngemva kwamalanga amathathu. Umuyi ubekwe eBuhera izolo. Isihlobo sakhe lesi sithi amapholisa aqale athi isidumbu sidojwe emgwaqweni kodwa odokotela bayalundula lokhu besithi uManyeruke ulethwe esibhedlela evela emhlangweni weHighfield lapho okutshaywe kwabotshwa khona abantu abanengi ngamapholisa abagoqela inkokheli yeMDC le NCA. UManyeruke ngowesibili osesaziwa ukuthi ufe ngenxa yokuxokozela okwenzakale embuthanweni lo. Omunye ngu Gift Tandare odutshulwe wafela khonapho isidumbu sakhe sangcwatshwa zinsoli zikahulumende ezibambe ngamandla ezinye izihlobo zikamuyi ukumngcwaba ngesiphangiphangi.

Kodwa inhlanganiso yabodokotela, iDoctors for Human Rights ithi asebefe bebulawa ngamanxeba okutshaywa embuthanweni weSave Zimbabwe wokuthandazela ilizwe balakho ukwedlula itshumi. Imizamo yeStudio Seven yokukhuluma loyise kamuyi yehlule ngoba ubelokhu eseBuhera namhla.

Ingcwethi ecubungula ezombusazwe, uMnu. Agrippa Madlela utshele uChris Gande we Studio Seven ukuthi amazwe ezwekazi le Africa ayehluleka ukumsola uMongameli Mugabe ngoba bemthatha njengomuntu olwisana labamhlophe, hatshi uzulu weZimbabwe.

Ezinye indaba ze studio7...

XS
SM
MD
LG