Umhlangano we nkokheli zamazwe awe zansi yezwekazi le Africa, iSADC lapho obekuhluzwa udaba lwe Zimbabwe wenziwe lamuhla e Tanzania.
Ephuma kulo umhlangano, uMongameli Robert Mugabe utshele umsakazo we CNN ukuthi inkokheli zamazwe la zilembono efana leyakhe, kodwa kachasisanga okunengi. Kulo umhlangano, kuvunyelwene ukuthi uMongameli Thabo Mbeki weleSouth Africa ukhethwe ukuba ngumlamlankunzi kwezombusazwe njalo amazwe aphetsheya akhiphe izijeziso azethesa eleZimbabwe.
EleBhilithane likhuthazwe ukuthi ligcwalise izithembiso zalo zokuncedisa ngemali uhlelo lokwabiwa kutsha komhlabathi.
Kunjalo-nje, isizalwane se Zimbabwe esihlala e Tanzania, uNkosazana Janet Mpofu sitshele uSithandekile Mhlanga we Studio 7 ukuthi isiphithiphithi esisekhaya sisakazwa emsakazweni eminengi kulelo lizwe njalo inengi labanjengaye lifuna umumo lo ulunge ngoba okusekhaya kuyabayangisa loba bekwamanye amazwe.