Ibandla le MDC elikhokhelwa nguMnumzana Morgan Tsvangirai libe lomhlangano lentathelizindaba lamhla eHarare, lapho uTsvangirai aveze khona ukuthi ibandla le ZANU PF lizama ukubhidliza ibandla lakhe kungakafiki ukhetho ngomnyaka ozayo.
Uthi lokhu ukwenza ngokubhomba indawo ezithile, esenzela ukugcona amalunga ebandla lakhe ngokuwethesa umlandu wokwenza lokho njalo sokubotshwe amalunga akhe afika kumakhulu ayisithupha, lokhe uhulumende eqalise imicimbicimbi yakhe.
UTsvangirai uveze ukuthi uzancintisa kukhetho lokudinga umongameli ngomnyaka ozayo ngoba umongameli Thabo Mbeki we South Africa, okhethwe ukuba ngumlamlankunzi kungxabangxoza eselizweni, emthembisile ukuthi ukhetho luzabe lukhululekile, kungelakuqila.
Abakade bekhona kulumhlangano bathi uTsvangirai ubonakale ezunguza incwadi athe ivela ku Mbeki emoyeni ukuthi abantu bayibone.
Ngaphambili kwalo umhlangano, uTsvangirai uhlangene labameli bakwamanye amazwe elizweni wabakhuthaza ukuthi be ncedise abahlukuluzwa ngamapholisa kanye lemuli zabo ngokudla ngoba bengesenelisi ukuziphandela.
Kunjalo nje ingcwethi ecubungula ezombusazwe, uMnumzana Dumisani Nkomo utshele istudio 7 ukuthi kaboni kusiba lobubelo elizweni ngokuthembela ku mongameli Thabo Mbeki ngoba uhlupho olukhona alungeke lwaqedwa libandla le Zanu PF lamacele e MDC kuphela, kodwa nguzulu wonke we Zimbabwe.