Amalunga enhlanganiso yamakhosikazi eyeWOZA lawogatsha lwayo lwabesilisa, iMOZA, atshengisele emizini ehlukeneyo yeHarare kwabotshwa abedlula amatshumi amathathu. Linhlanganiso ibitshengisela isola indlela inkampani yamandla kagetsi, iZESA, esebenza ngayo.
Ngeviki edluleyo iWOZA leMOZA zitshengisele kobulawayo kwabotshwa amalunga angamatshumi athoba minwe mibili. Isiphathamandla sewoza, uNkosazana Magodonga Mahlangu uchasisa okunengi ngokutshengisela kwalamuhla kungxoxo ayenze loChris Gande weStudio 7.
Kunjalo nje, ucuku lokuhlukuluzwa kwabalembono ehlukene lekahulumende ngamapholisa kubikwa selufike kusibanga esimangangalisayo. Ngeviki edluleyo amalunga eWOZA akade evalelwe abikwa ekhululwe impahla ahlala engqunu okwelanga lonke phakathi kwezinye izibotshwa kade zisele zigqoke impahla zazo.
Kwathi omunye untombazana osakhulayo, uClara Makoni, obesiyapha ababotshiweyo ukudla ubikwa evalelwe wasiwa phandle kwedolobho lakoBulawayo wahlukuluzwa andubana atshiywe ukuthi azihambele ngenyawo umango omude okumangalisayo. UClara ulandisele uChris Gande weStudio 7 ngalesi sihluku esimehleleyo.
Kulezifundi zekolitshi le nust ezithunjwe ngama CIO ngoLwesine ngemva komhlangango obuqoqwe yinhlanganiso ye Transpaency International owokucubungula udaba lokungethembeki kwezisebenzi zikahulumende lodaba lokuthathwa kwenhlelo zamanzi emadolobheni yinhlanganiso yeZINWA kwenye Ihotela koBulawayo. UMasautso Banda uyasethulela loludaba.