Inhlanganiso emela amalungelo ezisebenzi I Zimbabwe Congress of Trade Unions imanyane lezinye inhlanganiso emhlabeni jikelele ukunanza ilanga lezisebenzi, iWokers Day ngokuba lemihlangano endaweni ezitshiyeneyo zelizwe lapho ebibonisana lezisebenzi ngokungenziwa ukuthi impilo yazo ibe ngcono.
Isikhulumi senhlanganiso le, uNkosazana Khumbulani Ndlovu uthi inengi lembuthano yenhlanganiso yakhe ebiselizweni lonke jikelele iphumelele, loba nje izisebenzi ebezibuthane eRusape zichithelwe umhlangano ngamapholisa zaxotshwa ngoba kuthiwa azazisanga amapholisa ngaphambilini ngombuthano lo.
Kunjalo nje, ingcwethi ebona ngobudlelwano bezisebenzi labaqhatshi bazo, uMnumzana Davies Ndumiso Sibanda uthi kufanele kulungiswe umnotho welizwe andubana uhulumende, abaqhatshi kanye lezisebenzi behlale phansi bebonisane ngodaba lweholo eliphansi.