Ingcwethi kwezokulima zithi uhlelo luka hulumende lokupha abalimi abamhlophe abathathelwa amasimu, imali kusukela ngomyaka ka 2000 soluthethe isikhathi eside okungabe kubangelwa yikuthi uhulumende kalamali yokubhadalela intuthuko eyenziwa ngabalimi laba emhlabathini abebelawo. Amaviki amabili edluleyo i phephandaba le Herald lethule umbiko wokuthi uhulumende usenelise ukupha imali kubalimi abangamakhulu ayisitshiya galombili (800) kuphela. Kodwa abanye abalimi laba babikwa besala ukwamukela limali.
U Mnumzana Jonah Nkabinde ingcwethi kwezokulima utshele u Brenda Moyo we Studio 7 ukuthi abalimi bangabe besala ukuthatha limali ngoba bengavuma kutsho ukuthi bayabe sebevumelene lohulumende kudaba lokuthathelwa kwabo amapulazi lona inengi labo lilokhe lilethemba lokuthi udaba lolu lungaxazululwa yimithethwandaba.
Kunjalo nje omunye wabamhlophe owathathelwa amapulazi akhe nguhulumende, U Mmnumzana Alex Goosen utshele i Studio 7 ukuthi yena kasoze emukele imali ephiwa abalimi abathathelwa amapulazi nguhulumende ngoba inlutshwana kakhulu, esithi abayamukelayo yilaba asebeluphele kakhulu abangasela ezinye indlela zokuziphilisa.