Izifundi ezinhlanu ezivela kunhlanganiso ezimela izifundi ze south afrika bezethekelele kwele zimbabwe kusukeka ngeviki edluleyo zihlolisisa umumo oselizweni. Izifundi lezi bezivela kunhlanganiso zezifundi ezimbili i South African Students Congress i SASCO le South Africa Union of Students i SAUS. Izifundi lezi zethekelele ele Zimbabwe zinxuswe yinhlanganiso yezifundi ze Zimbabwe i Zimbabwe National Students Union, i ZINASU.
Zikwele Zimbabwe zenelise ukufika e mapulazini ka Sibalukhulu we Bhanga elikhulu lelizwe u Mnumzana Gideon Gono, lakwelika msekeli womphathintambo obona ngezokulima u Mnumzana Sylvester Nguni lapho abathi bafice izizebenzi zemapulazini la zikhala ngokusetshenziswa gadalala zingatholi iholo lazo ngesikhathi esifaneleyo. Epulazini lika Nguni izifundi lezi zithi izisebenzi bezikhala ngendlala lokuthi azikanikwa iholo lazo okwenyanga ezintathu lokuthi kulezinye izisebenzi zepulazini leli ezibulewe yindlala kunsuku ezedluleyo. I Studio 7 ayenelisanga ukukhuluma lababili laba ngodaba lolu.
Izifundi lezi zethekelele imizi embalwa ehlala abanengi lase University of Zimbabwe, lapho ezithi e UZ zifice kusakhiwa ugatsha olutsha lwezifundo oluthiwa War and Strategy Studies okuzimangalise ukuthi kambe izifundo lezi zizaphathisa njani ilizwe le Zimbabwe lokuthi kambe ele Zimbabwe lilungiselela ukuya empini lobani? Emizini ehlala abanengi zifice eminengi yazo ingela manzi lamagetsi. U Brenda Moyo we Studio 7 ukhulume lomunye obekuqula leli ongathandanga ukuqanjwa igama lakhe esithi ulesifiso sokubuyela njalo kwele Zimbabwe, okhuluma ngabakubonileyo.