Inengi labantu lithi ukunqoba kwebandla le zanu pf kukhetho lokudinga ozamela izaka east edale lephalamende ngempelansonto akutshengisi ukuthi ibandla leli lilosekelo olunengi ngoba belincintisana lamabandla angaziwayo ngabanengi kukanti labantu bengavotanga ngobunengi babo.
Umnumzana Livingstone Chineka webandla le Zanu PF uthole amavoti angu 11 152,kwathi uMnumzana Nicholas Shanga, webandla le United People’s Party wathola 1,117 kukanti uLameck Batirai we ZPDP, uthole angu 622. Iziphathamandla zama bandla abencintisa zitshele iStudio 7 ukuthi ibandla le zanu pf linqobe ngokuqilibezela ngoba bekulokwethusela okunengi kulolukhetho. USithandekile Mhlanga weStudio 7 uxoxe loMnumzana Reggie Moyo, ingcwethi ecubungula ezombusazwe njalo engumgcinisihlalo wenhlanganiso edinga isisekelo esitsha sombuso, iNCA ukuze sizwe imbono yakhe ngaloludaba.