Ingcwethi kwezombusazwe zithi ukugenqula uhulumende we Zimbabwe akusiyonto engenzeka lula elizweni lapho uzulu wonke jikelele elokwesaba ngenxa yokwethusela okuhlezi kusenziwa libandla le ZANU PF.
Kulemibiko ethi amalunga ebutho ayisikhombisa abotshiwe ngodaba lokuqoqa ukugenqula uhulumende kaMongameli Robert Mugabe. Abayisikhombisa laba asebesaziwa amagama abo kubikwa besiwe emthethwandaba lamhla besetheswa icala lokufuna ukugenqula uhulumende. Igqwetha abo uMnumzana Charles Warara utshele i Studio7 ukuthi icala leli selidluliselwe phambili kumhlaka 22 kuyonale inyanga.
Imibiko ithi umthethwandaba ulamaphepha atshengisa ukuthi ababotshiweyo laba bebesebenzelana loMnumzana Emmerson Munangagwa okuthiwa nguye obezathatha intambo zokuba ngumkhokheli kahulumende. Kodwa uMnangagwa ukulandule lokhu ekhuluma lephephandaba le The Independent.
U Mnumzana Zenzo Nkomo ingcwethi ecubungula ezombusazwe, elilunga le Communist Party ye South Africa, utshele u Brenda Moyo we Studio7 ukuthi amalunga ebutho ayakwazi ukuthi ukugenqula uhulumende akuncedi lutho ngoba amazwe omhlaba engakusekeli.
