Ugatsha olubona ngezempilakahle soluthembise ukuthi kusiyaphela umnyaka lo luzabe selwengezelele inani labantu abatholiswa imithi ehlisa ukumemetheka komkhuhlane we Aids. Umphathintambo obona ngezempilakahle uDokotela David Parerenyatwa uthi ugatsha lwakhe lukhangelelwe ukwenelisa ukupha imithi yama ARVs abanye asebephila legcikwane abangu 40 thousand phezu kwabangu 80 thousand abavele betholiswa limithi khatshesi.
UHulumende weMelika laye uphe ugatsha lolu imali engange 18 million yamadollar eMelika ezakwabelwa ilizwe okweminyaka emithathu elandelayo yokulwisa umkhuhlane lo. Amanye amazwe agoqela i Bhilithane lamanye lawo aqhubeka esipha uncedo lwemali kuhulumende we Zimbabwe ukuze kulwiswe umkhuhlane wengculaza ngendlela ezigoqela ukutholiswa kwasebephila legcikwane imithi yama ARVs,imfundiso yokuzivikela lokunye.
Ingcwethi ezicubungula ukusebenza kwamasotsha omzimba okuzivikela emikhuhlaneni, zithi e Zimbabwe abezempilakahle sokumele baqakathekise ukulwisana lemikhuhlane ye HIV Aids, i TB, i Malaria lama Allergies. UDokotela Elopy Sibanda ingcwethi emkhuhlaneni wengculaza uchasisela u Brenda Moyo we Studio7 ngemikhuhlane yama Allergies, langohlelo luka Hulumende lokulwisana lokumemetheka kwengculaza.