IBhanga elikhulu lelizwe le Australia i Reserve Bank of Australia- RBA selethulele iziphathamandla zebandla le ZANU PF ezingamatshumi amabili lasikhombisa, izijeziso zenotho,ukuthi zingasabi lobudlelwano lelizwe leli kwezamabhizimisi. Ibhanga leli lethule umbiko wokuthi iziphathamandla ze ZANU PF lezi labanye abezamabhizimisi abalobedlelwano lohulumende akusamelanga benze ibhizimisi lalelilizwe ngaphande kokuthi i RBA iphe imvumo.
Abanye abethulelwe izijeziso lezi ngumsekeli kamphathintambo obona ngezamanzi uMnumzana Walter Mzembi, owezamabhizimisi uMnumzana Guy Georgias, umsekeli kamphathintambo obona ngokuthuthukiswa kwezamabhizimisi abansundu elizweni uNkosikazi Tracy Mutinhiri , isiphathamandla se Zimpapers uMnumzana Hebert Nkala, labanye. Kulabathathu abalamabizo abo esulwe kuloluluhlu abagoqela umuyi uMnumzana Tichaona Jokonya, umuyi uMnumzana Tinos Rusere lonkosikazi Elizabeth Nerwande.
Uhulumende we Australia wethula lezizijeziso zenotho kulandela ukuvimba iqembu lalelolizwe lomdlalo wecricket ukuyadlala e Zimbabwe ngenyanga ka September esithi i Zimbabwe ilokhe iqhubeka isephula ilungelo loluntu. U Brenda Moyo we Studio7 ukhulume lengcwethi ecubungula ezombusazwe uMnumzana Jethro mpofu oqala ngokuchasisa ukuthi labo abetheswe izijeziso lezi bangabe besizwa njani,lokuthi lokhu kutshoni empilweni zabo.