Abantu bebexokozela lokuphithizela bethenga izinto ezehliswe intengo e Harare. KoBulawayo kubikwa ezinye izinto ezifana lesinkwa lempuphu bezingasatholakali ngemva kokwehla kwentengo lokhu, kulandela isingqumo esethulwe ngumphathintambo wezokuthengiselana, uMnumzana Obert Mpofu, sokuthi intengo yezinto zonke elizweni ezigoqela imtshova, amaphephandaba, isepha lokunye, yehliswe ngesilinganiso esingamatshumi amahlanu ekhulwini, okuyintengo yezinto yeviki edluleyo ingakakhwezwa.
Amalunga etask force on monitoring and stabilization abikwa abesalisa abantu ukuthi bathenge izinto ezinengi ngoba ezinye besezisilela ngenxa yokuthengwa ngobunengi bazo. Intathelizindaba yethu u Mark Peter Nthambe usethulela lolu daba. Kunjalo nje, ukwehliswa kwentengo lokhu kwamukelwe ngabanye besithi kuzakwenza impilo ibelula ngoba abanini bamabhizimusi besebekhweza intengo mahlayana. Uhulumende uthi uzaqala akhangele izizatho zokukhwezwa kwezinto andubana avume ukuthi intengo ikhwezwe.
Ukhansila womuzi weCowdray Park, elilunga leZanu PF, uNkosazana Stars Mathe Thebe, utshele uChris Gande weStudio 7 ukuthi inyathelo elithethwe nguhlumende lingaphumelela ekulungisiseni udaba lokukhwezwa kwezinto nxa uzulu engalisekela. Kunjalo nje,abanye bathi inyathelo leli elikahulumende lokwehlisa intengo yezinto lizenza impilo kazulu ibenzima ngamandla ngoba izinto zizasilela ezitolo.
Abanye osobhizimusi batshele iStudio 7 ukuthi sebezahle bavale amabhizimusi abo ngenxa yenyathelo likahulumende leli. Kodwa inengi labosobhizimusi, abagoqela abamakhombi labanini bezindlu ezilamaloja abakhulume leStudio 7 bathi kabasoze balandele isingqumo sikahulumende.
Umsekeli kanobhala jikelele wecele leMDC elikhokhelwa nguMnumzana Arthur Mutambara, uNkosikazi Priscila Misihairambwi Mushonga uphe iStudio 7 imbono yakhe ngaloludaba.