Ingcwethi ezimbili ezicubungula ezamanzi eze University of Zimbabwe zithi sezisungule uhlelo oluzathatha phose umnyaka owodwa lokucubungula ngamanzi asetshenziswa lidolobho le Harare asuka kudamu u Chivero. Kumibiko ephume kuphephandaba le Herald ingcwethi lezi o Doctor Tamuka Nhiwatiwa lo Maxwell Barson bathi injongo yabo ngeyokuhlosisa umumo wamanzi aphuma kulelidamu ukuthi kambe angabe elengcekeza engakanani, njalo engaphazamisa kangakanani impilakahle kazulu.
Kodwa ingcwethi ebona ngokubuswa kwezabelo, uMnumzana Rejoice Ngwenya utshele u Brenda Moyo we Studio 7 ukuthi ukucubungulwa kwamanzi edolobho le Harare akusoze kulethe mahluko, esithi okunye okwenza amanzi alelidolobho aphume engcolile zimpompi ezithwala amanzi ekade zabola lokungasebenzi kuhle kwesititshi samanzi ese Morton Jaffray water works.