Inhlanganiso ye Mafela Trust ithi isidlulisele phambili ilanga lokuthi abafelwa yizihlobo zabo ezazilwela impi yenkululeko eZambia zivakatshele amangcwaba azo.
Bekukhangelelwe ukuthi izihlobo zabantu laba, zizakuya enkambeni ze Nampundu, eMkushi le Freedom Camp eZambia lapho okwakulamabutho eZipra khona, ngelanga lokunanza amaqhawe awalwela inkuleko yelizwe, i Heroes Day ngeviki ezayo kodwa sezizahamba mhlaka 23 ngoba kulabantu abanengi ababikwa befuna ukuhamba. Bekulenhlelo ezinengi –nengi zokudinga imali yokufeza loluhlelo, njalo olunye uhlelo lukhangelelwe ukuba khona ngempelansonto.
Uhulumende we Zambia ubikwa esethembise ukugcina izethekeli lezi. I Mafela Trust yinhlanganiso ezimele yodwa eyasungulwa ngemva kokumanyana kwe Zanu le Zapu ngomnyaka ka1987 njalo injongo yayo ngeyokudingisisa imbali ye Zapu le Zipra iphinde ikhankasele ukumanyana lokuthula ebantwini. URetired Colonel Ray Ncube, okukomiti eqoqa lolu hambo kulinhlanganiso, utshele uSithandekile Mhlanga weStudio 7 ukuthi inane labantu abafuna ukuya eZambia lokhu lisanda yikho bebanike isikhathi.