Kufe umuntu owayedwa kwalimala abedlula amatshumi amahlanu engozini yokungqikilana kwezitimela eHarare lamuhla ekuseni. Esinye isitimela ebesithwele izihambi zedolobheni, esaziwa ngokuthi yiFreedom Train, sibikwa besilubhekise emzini we mabvuku sangqikilana lesikade sithwele impahla silubhekise koBulawayo.
Abalitshumi lanye babalimeleyo babikwa impilo yabo isengozini embi. Isitimela sibikwa sibe sithwele abantu abanengi ngoba lezinsuku imota lamabhasi athwala uzulu esilela. Owake waba ngumanjinela wenkampani kaLoliwe, uMnu Agrippa Madlela utshele uChris Gande weStudio 7 ukuthi okunye okubangela ingozi ezinje yikuthi izitimela ezithwala uzulu zisebenzisa injanji eyiyo esetshenziswa yizitimela ezithwala impahla.
Kunjano nje, izisebenzi zenkampani kaloliwe ezigoqela abatshayeli labomanjinela zibikwa seziqalisile ukukhalala umsebenzi, okuthiwa yi go-slow ngesingisi zikhonona ngophuza kwalinkampani ukuzihlawula iholo lazo.
Izisebenzi lezi bezimele zihole kumaviki amabili edluleyo kodwa lalamuhla lokhe zingakaholi. Lokhu sokubangele ukuthi izitimela zehluleke ukubamba isikhathi sazo sokuhamba lokhu osokuphazamise uzulu ovame ukuhamba ngololiwe. Lobanje isikhulumi senye yenhlanganiso ezimela izisebenzi zikaloliwe koBulawayo uMnu Phibion Chenyika engathandanga ukukhuluma okunengi ngalokhu, ezinye izisebenzi zalinkampani zithi ziku go-slow.
Zithi isitimela seHarare leseVictoria Falls sezitshona ziphuzile. UNtungamili Nkomo owestudio 7 uxoxe loHerbert Ndlovu ovame ukuhamba ngesitimela sikaloliwe. UNdlovu ngusomabhizimusi othi kumele agijimele eVictoria Falls ukuyakwenza ibhizimusi.