amalinks wokungena

Breaking News

Abalwa Impi Yenkululeko Bathi UTsvangirai Kumele Avinjwe Ukuncintisa Kukhetho


Abalwa impi yenkululeko labanye abasekela ibandla le ZANU PF bafole edolobheni leHarare namhlanje bestshengisa usekelo lwabo kuMongameli Robert Mugabe. Abafolileyo laba bebesedlula inkulungwane ezinhlanu. UMongameli Mugabe uhlangane labasekeli bakhe laba emahofisini amakhulu ebandla lakhe, wababonga ngosekelo lwabo, waphinda wasola ohulumende bamazwe asentshonalanga ngokwethulela eleZimbabwe izijeziso zenotho, esithi izijeziso lezi yizo esezibangele ubunzima obubhekane lelizwe.

Umsekeli wesikhulumi secele le MDC elikhokhelwa nguMnumzana Arthur Mutambara, uMnumzana Abednico Bhebhe uchothoze abasekeli beZANU PF laba esithi abakwenzileyo kulihlazo, ngoba besekela u Mugabe ngokubulala ilizwe.

Kunjalonje abalwa impi yenkululeko abafole ezitaladeni ze Harare namhla, bathi uMongameli welinye icele le MDC, uMnumzana Morgan Tsvangirai kumele avinjwe ekuncintiseni kukhetho lomnyaka ozayo. abalwa impi laba batsho lokhu kulandela uhambo luka Tsvangirai kwele Austrialia. Amaphephandaba lemisakazo kahulumende achothoza uTsvangirai ngohambo lolu egcizelela umbono kahulumende wokuthi uTsvangirai uyisiphamaso samazwe entshonalanga.

Kodwa ingcwethi kwezombusazwe engumqondisi we Bulawayo Agenda, uMnumzana Gorden Moyo utshele u Brenda Moyo we Studio 7 ukuthi abalwa impi yenkululeko laba basetshenziswa nguMongameli Mugabe ukutshengisa angani ulosekelo, esithi udaba lokuvimba u Tsvangirai ukuthi ancintise kukhetho kutshengisa ukuthi ibandla elibusayo lesaba ukunqontshwa ngabamabandla aphikisayo kukhetho oluzayo.

Ezinye Indaba ZeStudio7..

XS
SM
MD
LG