Icele lebandla le MDC elikhokhelwa nguMnu. Arthur Mutambara lithi lizamelwa nguMnu. Paul Themba Nyathi eMakokoba kukhetho lokudinga abameli bedale lephalamende oluzayo.
Isigaba lesi simelwe nguNkosazana Thokozani Khuphe, ongumsekeli ka Mnu. Morgan Tsvangirai, okhekhela elinye icele le MDC.
Lelinyathela liveza sobala ukuthi amacele womabili eMDC awaseyikumanyana kungakafiki ukhetho. Isikhulumi secele elikhokhelwa nguMutambara, uMnu. Abednico Bhebhe utshele uChris Gande we studio 7 ukuthi abantu be Makokoba yibo abacele uMnu. Nyathi, owanqotshwa libandla le ZANU PF, kukhetho olufanayo eGwanda, ukuthi abamele kulesisigaba ngoba besithi amalunga akucele lika Tsvangirai awalandaba lengqubelaphambili yesigaba semandebeleni.
Kunjalo nje, uNkosazana Thokozani Khuphe, olokhu emela isigaba seMakokoba kusukela enqoba uNkosikazi Sithembiso Nyoni webandla le ZANU PF ngomnyaka ka 2000 amacele womabili esabambene, uthi laye uzancintisa kulesisigaba emele icele lakhe njalo ulethemba lokuthi uzanqoba.