Inhlanganiso yabafundi, iZINASU lamuhla yethula umbiko othi amalunga ayo, azinkokheli zabafundi e Great Zimbabwe University asezandleni zamapholisa e Masvingo Police Station.
Abafundi laba ngu Ogylive Makova, u Witlaw Mugwiji lo Mukudzei Shoko ababikwa bebotshwe besenza umhlangano ekolitshini leli.
Istudio 7 isiya emoyeni ibengakenelisi ukuzwa ukuthi abathathu laba bengabe sebekhululiwe kumbe hatshi.
Abafundi laba babika njalo ukuthi umumo mubi e University of Zimbabwe ngoba izindlu zokuthi befunde behlezi kuzo lokhu zivaliwe, osokubangele ukuthi abafundi balelikolitshi babe ngumhlambi kazelusile, kukanti lenkokheli yabafundi e Chinhoyi University of Technology layo yalelwe ukufunda ihlala kulelikolitshi.
Inhlanganiso le ithi indlala ibhahile emakolitshini wonke, njalo inane labafundi seliphansi ngenxa yezizatho ezinengi. Ithi izehlakalo zonke lezi zikhombisa ukuhlukuluzwa okungekho emthethweni ezithi zizalwisa ukuthi kulungiswe.
USithandekile Mhlanga we studio 7 uxoxe lo Mnu. Mfundo Mlilo, owake waba yisiphathamandla se ZINASU njalo waqoqa ugwalo oluhlela umumo emakolitshi emfundo ephezulu elizweni ukuzwe sizwe imbono yakhe ngaloludaba.