Isifundi seNational University of Science and Technology i NUST ebesibotshiwe kusukela ngolweSibili sikhululwe ngamapholisa namhlanje ko Bulawayo. UThemba Maphenduka oyisiphathamandla senhlanganiso yezifundi iZimbabwe National Students Union-ZINASU, uthi amapholisa amkhulule engamethesanga cala. UMaphenduka utshele u Brenda Moyo weStudio 7 ukuthi amapholisa amhlukuluze kakhulu esesitokosini alisa izihlobo zakhe legqwetha ukumbona, waqeda insuku ezimbili engadlanga, esola ukuqhubeka kwawo ehlukuluza izifundi zemakolitshini emfundo yaphezulu.