Abasekeli bebandla le MDC elikhokhelwa nguMnu. Morgan Tsvangirai, abangamatshumi amahlanu babotshiwe izolo ntambama eBindura bakhululwa lamuhla ngemva kokuhlawula imali yesibambiso i bail.
Lokhu bekulandela umhlangano wabatsha owenziwe yilelicele izolo. Umgcinisihlalo wabatsha kulelicele uThamsanqa Mahlangu utshele istudio 7 ukuthi abasekeli bebandla le ZANU PF bahlukuluze amalunga abo basebebabophisa besithi yibo abaqale lobu budlwangudlwangu.
Uthi abalwa impi yenkululeko bebefolile kulindawo mgomgqibelo, belomkhokheli wabo uMnu. Jabulani Sibanda, okungabe kubangele ukuthi bebelokhu bekhona kulindawo izolo.
Lokhu kwenzakala umphathintambo wogatsha lukahulumende olubona ngokwenzakala elizweni, uMnu. Kembo Mohadi ebize inkokheli yalelicele ukuthi lizoveza ubufakazi bokuthi kulobudlwangudlwangu obenzakalayo elizweni kuhlukuluzwa amalunga ecele leli.
Icele leli selivumile ukuthi lizahlangana laye ngolwesithathu. Istudio 7 ixoxe loMahlangu esuka eHarare esiya eBindura ukuyahlolisisa ngokwenzakeleyo.
Kunjalo-nje, umthethwandaba kamantshi eMasvingo lamuhla unqume ukuthi izifundi ezine eze Great Zimbabwe University eMasvingo, ezabotshelwa amacala atshiyeneyo ziqhubeke zihlala esitokisini zize zimiswe phambi komthethwandaba njalo.
Omunye wezifundi lezi ngu Eddison Hlatshwayo, oyisiphathamandla senhlanganiso yezifundi, i Students Representative Council kulelikolitshi, ozaqhubeka ehlala esitokisini okwamalanga ayisikhombisa.
Ezinye izifundi ngu george makamure, uBrenda Mupfurutsa lo Ogylive Makova, ababotshelwa ukusola kokubotshwa kuka Hlatshwayo, abazahlala esitokisini baze bayemiswa phambi komthethwandaba ngolwesine.
Isiphathamandla senhlanganiso ebona ngamalungelo ezifundi, iZINASU, uBenjamin Nyandoro uthi inhlanganiso yakhe isibhalele umongameli Robert Mugabe ngalesisehlakalo ngoba asilunganga.