Usibalukhulu webhanga elikhulu lelizwe i Reserve Bank of Zimbabwe, uMnumzana Gideon Gono usethembise uzulu ukuthi izinto ezisilelayo ezitolo sezizaqalisa ukutholakala. Ekhuluma emhlanganweni lentathelizindaba obekulezinye iziphathamandla zikahulumende, namhla, uGono uchothoze uhlelo lukahulumende lokwehliswa kwentengo esithi akuncedi ukuthi intengo yehliswe izinto besezisilela ezitolo. UGono uthi iRBZ isakhe ubudlelwano bokuqinisa ezamabhimisi labalungisa izinto, labazithengisayo ukuze impahla zitholakale ezitolo ngokuphangisa.
Kunjalo nje izinto ezigoqela itshukela, amafutha okuphekisa, imphuphu lokunye zitholakala emkambo womkoto kuphela lapho ezithengiswa khona ngentengo eqonge okwesabekayo. IStudio 7 ikhulume lesizalwane seZimbabwe esihlala kwele South Africa esithi uhulumende kumele asuke esikhundleni ukuze umumo okhona khathesi ulungiseke. UBongani Nxumalo uthi nyanga zonke uthumezela imuli yakhe kweleZimbabwe ukudla esebenzisa omalayitsha labo asebedulela ukufa.
