Abafundi be Great Zimbabwe University abane ababotshwe ngeviki edluleyo ngodaba lokutshengisela bakhululwe ngumthethwandaba weMasvingo lamuhla ngemva kokuhlawuliswa imali yesibambiso.
Abafundi laba ababalisa uGeorge Makamure, Brenda Mupfurutsa, Olivia Makova loJoel Dungudza bahlawuliswe izigidi ezinhlanu zamadollar ngamunye njalo bazaphindela emthethwandaba mhlaka 7 November. Unobhala jikelele weGreat Zimbabwe University Students Executive Council u Edson Hlatshwayo obotshwe mhlaka 27 September obelokhe evalelwe uze wakhululwa laye izolo.
Laye uhlawuliswe izigidi ezinhlanu zamadollar eyesibambiso njalo uzamiswa phambi komthethwandaba mhlaka 14 November. Sibe lethuba lokuxoxa loHlatshwayo echasisa ngokuvalelwa okwesikhathi eside lokukhululwa kwakhe.