amalinks wokungena

Breaking News

Icele LeMDC Elikhokhelwa NguMnumzana Arthur Mutambara Likhuthaza Uzulu Ukuthi Aphatheke Kukhetho Lomnyaka Ozayo


Icele le MDC elikhokhelwa nguMnumzana Morgan Tsvangirai laloba libhekane lokubhidlika, ngemva kokukhitshwa esikhundleni kwenkokheli yabesifazane, lezinye indubeko kungatsha zayo kwezinye izigaba zelizwe lakwamanye amazwe, lenelise ukuqhuba imihlangano yama rally ezigabeni ezimbalwa zelizwe ezigoqela iManicaland. Icele leli libe lemihlangano emibili ko Bulawayo ngoMgqibelo langeSonto, ekhanya ingahambanga kuhle.

UTsvangirai kasabanga khona kowangoMgqibelo ngokwesaba abasakhulayo abebandla lakhe abacunulwe yikukhitshwa esikhundleni kwenkokheli yabo mama. OwangeSonto, lapha obekumele kukhethwe inkokheli entsha yohlangothi lwabesifazane kucine kuphuma amaxuku amabili elikhokhelwa ngumsekeli ka Tsvangirai uNkosazana Thokozani Khuphe lelikhokhelwa ngobe ngumkhokheli wohlangothi lwabesifazane, uNkosikazi Lucia Matibenga.

Amaxuku omabili acine ekhetha inkokheli yawo yabesifazane, elika Nkosazana Khuphe lakhetha uNkosikazi Theressa Makone, kwathi u Matibenga wakhethwa ukuqhubeka ekhokhela uhlangothi lolu. UNkosikazi Makone ubikwa esebenzisa imali ukuthenga abasekeli, ngoba yena lomkakhe uMnumzana Ian Makone, ongumcebisi ka Tsvangirai bebikwa benothe okwesabekayo. Sikhuluma nje ku MDC ekhokhelwa nguMnumzana Morgan Tsvangirai sokulenhlangothi zabesifazane ezimbili.

Kunjalo nje icele elikhokhelwa nguMnumzana Arthur Mutambara lenze imihlangano labasekeli balo ko bulawayo ngomgqibelo. Ngesonto laba lemihlangano emithathu esigabeni Gwanda. Imihlangano le ibingeyokukhuthaza uzulu ukuthi aphatheke emalungiselelweni okhetho lomnykaka ozayo. Okunengi ngemihlangano le asikuzweni kusikhulumi salelibandla esigabeni se Matebeleland South, enguMayor wedolobho leGwanda, uMnumzana Thandeko Zinti Mnkandla.

Ezinye Indaba ZeStudio7..

XS
SM
MD
LG