amalinks wokungena

Breaking News

Abasakhulayo Becele LeMDC Elikhokhelwa NguMnumzana Morgan Tsvangirai Bavuka Eseganga


Udlakela kuhlangothi lwabasakhulayo kucele le MDC elikhokhelwa nguMnumzana Morgan Tsvangirai ngesinye isizatho esabangela ukubhidlika kwebandla ngomnyaka ka 2005. Abasakhulayo abakhanya betshotshozelwa ngumkhokheli walelicele sebehlukuluze abalemibono ehlukene leyomkhokheli wabo abagoqela uNkosikazi Trudy Stevenson owecele le MDC elikhokhelwa nguMnumzana Arthur Mutambara ngomnyaka ka 2006.

Ngemva kokwesulwa kwenkokheli yohlangothi lwabesifazane abasekela uNkosikazi Lucia Matibenga osuswe esikhundleni, abagoqela abameli bedale lepalamende abathathu batshaywe balinyazwa ngabasakhulayo laba. Kusukela ngolweSihlanu lweviki edluleyo abasakhulayo laba baqhubeke betshaya lokuhlukuluza bonke abacatshangelwa ukuthi bakucele likaNkosikazi Matibenga. kumaviki edluleyo edolobheni lako Bulawayo abasakhulayo okuthiwa ngabaka Nkosazana Thokozani Khuphe umsekeli ka Tsvangirai labo bahlukuluze abantu okuthiwa basebenza lo Matibenga.

Izolo abesifazane abathathu akade betshengisela batshaywe kakubi emahofisini alelibandla e Harvest House bekhokhelwa ngosakhulayo okuthiwa ngu Tonderai Ndira. Namhlanje kubikwa abasakhulayo laba baqale ukuvimba bonke abacatshangelwa ukuthi basebenza lo Matibenga ukuthi bengasavunyelwa ukungena emahofisini ebandla. Kodwa lelibandla lihlezi lilandula ubudlwangu dlwangu obenziwa ngabasakhulayo balo.

U Brenda Moyo weStudio 7 ukhulume lomgcinisihlalo wohlangothi lwabasakhulayo u Thamsanqa Mahlangu othi ibandla lakhe lizacubungula indaba zobudlwangudlwangu lezi beselithatha amanyathelo.

Ezinye Indaba ZeStudio 7..

XS
SM
MD
LG