Kulabasekeli beZanu PF ababili abathi uGift Katana loRodgers Saidi abamiswe phambi komthethwandaba weMutoko lamuhla besetheswa icala lokutshaya imota yeMDC ngembokodo ngempelaviki.
Bobabili laba baphuthunywe ngabasekeli beMDC ngoMgqibelo ngemva kokuba becathamele imota yabo bayitshaya ngamatshe babulala amawindi. Bobabili laba bahlawuliswe izigidi ezilitshumi lanhlanu zamadollar ngamunye eyesibambiso. Ngakwelinye icele kulababili abeMDC abamiswe phambi komthethwandaba ofanayo besetheswa icala lokutshaya abasekeli beZanu PF ababili laba ngemva kokuba bebaphuthumile.
U Engias Asiti loMazarura bakhululwe bengabhadaliswanga imali yesibambiso. Bazaphindela njalo emthethwandaba mhlaka 1 ngoMpalakazi. Kunjalo nje amapholisa abikwa elokhe ehluzisisa udaba lokutshiswa kwendlu yomunye umsekeli weMDC eBindura izolo ngabantu abacatshangelwa ukuthi ngabasekeli beZanu PF.
Unkosazana Eninha Longwe, ubengumsekeli weZanu PF kodwa wasuka kulelibdnala kunyanga ezimbili ezedluleyo esesiya kuMDC kaTsvangirai. Ubesebenza njalo kumanisipala weBindura, kodwa uhle waxotshwa umsebenzi ngoba iziphathamandla zalikhansili zisithi sengumhlamuki. Likhansili yona ilamalunga eZanu PF amanengi.
Ngokutshiswa kwendlu yakhe, uNkosazana Longwe uthi akathandabuzi ukuthi ngabasekeli beZanu PF abenze lokhu ngoba becatshulwe yikubhazuka kwakhe esesiya kuMDC. Umgchinisihlalo wabasha kuMDC ekhokhelwa nguMnu Tsvangirai uMnu Thamsanqa Mahlangu uthi yena inkulumo eziphakathi kweMDC leZanu PF ziyize nanku iZanu PF siqalisile umkhuba wayo wobudlwangudlwangu.