Abasekeli bebandla elibusayo ele ZANU PF bakhangelelwe ukufola kusasa ezitaladeni zedolobho leHarare betshengisela usekelo lwabo lokuthi uMongameli Robert Mugabe amele lelibandla kukhetho lomnyaka ozayo. Ukufola lokhu kuqoqwe yinhlanganiso yabalwa impi yenkululeko i Zimbabwe National Liberation War Veterans Association. Sikhulumanje abantu baphakathi kokuthuthwa ngamabhasi lezitimela besuka kuzigaba zonke zelizwe. U Brenda Moyo weStudio 7 ukhulume lomkhokheli wenhlanganiso yabalwa impi yenkululeko le uMnumzana Jabulani Sibanda ochasisa ngokuqakatheka kokufola kwabo abakubiza ngokuthi yi Million Man and Women March.
Kodwa umgcinisihlalo weyinye inhlanganiso yabalwa impi yenkululeko, i Zimbabwe Liberators Platform Peace Initiative, uMnumzana Max Mnkandla othi ukufola kwakusasa lokhu ngamadlwane nje kuphela. UMnkandla othi laye uzabe ekhona embuthanweni lo uthi ukusekela u Mugabe ukuthi amele ibandla le ZANU PF kukhetho lomnyaka ozayo kutshengisa sobala ukuthi bakhona abanye abafuna lesisikhundla kulelibandla, esithi kuZANU PF kuyalwiwa.