amalinks wokungena

Breaking News

Abalwela Amalungelo Oluntu eZimbabwe Bamanyana Labanye Emhlabeni Jikelele Ekunanzeni Ilanga leInternational Human Rights Day


Inhlanganiso yamalungelo abantu e Zimbabwe eye ZIMRIGHTS ikhokhele ukufola kwabantu kunanzwa ilanga lamalungelo abantu emhlabeni wonke le International Human Rights Day e Harare.

Abantu bafole bevela emahofisini e ZIMRIGHTS esigodlweni bahambe belandela umgwaqo u Fouth street bayojika ngomgwaqo u George Silundika besiyongena e Africa Unity Square lapho okwethulwe khona imbiko etshiyeneyo. Ukufola lokhu kungenwe yinhlanganiso ezitshiyeneyo ezigoqela inhlanganiso yezifundi eye ZINASU, esekela izifundi eye Student Solidarity Trust, eye Crisis Coalition labantu makhaza. Ukufola lokhu kuhambe kakuhle amapolisa ephelekezela abafolayo njalo ebavulela imigwaqo ngokumisa izimota emarobotini.

Ekhuluma kulumbuthano uNkosikazi Febi Silukhumbula owe ZIMRIGHTS uthe umumo wezinto usumubi kakhulu kwezamalungelo abantu kuleli ethi abantu sebeswela izinto ezililungelo labo ezifana lokudla, izindlu zokuhlala leziqgoko. Uthe imhuli ezinengi azisenelisi ukungenisa abantwana ezikolweni ukuba bazuze infundo ngoba inengi labantu lingela misebenzi. Uthi ngalokho abantu abanengi bacina befaka impilo yabo engozini bezama ukufohla imincele yelizwe ukuba beyodinga imisebenzi ngaphandle kwelizwe ukuba bethole impilo engcono. Uqubekele phambili esithi ukuqonga osokusenza intengo yezinto nsuku zonke lokubhidlika osokusenza ezempilakahle ezibhedlela, ukusilela kwemithi yokwelapha lezisebenzi ezifundele umsebenzi sokusenza ukuba izibhedlela zibe yindawo zokuyafelakhona.

Uthi ngaphandle kwalokhu ukusilela okwenza izinto eziqakathekileyo empilweni ezitolweni kanye lokusilela kwemali emabhanga sokubangela ukuthi abantu bahlukulezeke enqondweni kakhulu. Uphinde wathi umumo wezinto onje ubangela ukuthi imhuli zibhidlike ngoba abantu sebekhetha ukuphuma ngaphandle besiyasebenzela kwamanye amazwe besehlukaniswa lemhuli zabo. Uthe lokhe kunzima ukufola lokubamba imihlangano e Zimbabwe ngoba kumele abantu bacele kuqala njalo nxa bengaithola imvumo kuzamele banikezwe imigoqo yokulandela kuqala ethi lokhu yikwephulwa kwelungelo labantu.

Abanye abakhulume kulumbuthano bagoqela u Belove Chiweshe wenhlanganiso ye ZINASU lo Macdonald Lewanika owe Student Solidarity Trust abathe umumo wezinto usumanzonzo kwezenfundo kuleli. Umnumzana Jacob Mafume owenhlanganiso ye Crisis Coalition ukhuthaze abantu ukuba babhalise ngobunengi babo beyo vota kukhetho oluzayo ngoba kulilungelo labo. Amapolisa e riot ona be phose ilihlo kulumbuthano ahle azisa ukuba imizuzu engamatshumi amabili ebinikezwe lumhlangano siphelile ahle amisa umhlangano.

Kusenjalo amagcwetha lawo atshengesele e Harare lamhlanje phansi kwenhlanganiso emela amagcwetha avikela amalungelo abantu awe Lawyers For Human Rights. Amagcwetha la atshengisele evela kumgwaqo u Fouth street elubhekise edale lomithethwandaba waphezulu owe High Court eqoke amabhatshi awo omsebenzi ekhuthaza ukulandelwa kwamalungelo abantu elizweni. Amagwetha la ahlanganisele lamagwetha aziwayo kwezama lungelo abantu okuhlanganisela uMnumzana Alec Muchadehama we Mbidzo Muchadehama and Makoni.

Enye inhlanganiso yezemidlalo ye Theather eye Vhitori Entertainment layo isungule imidlalo ekhuthaza ukuthuthukuswa kwamalungelo abantu kuleli. Imidlalo le ye Drama isungulwa lamhlanje e Harare endawnei ezigoqela i Theatre at the Park, Mbare, le Highfield.

Ezinye indaba ngesiNdebele...

XS
SM
MD
LG