Ukuguqulwa kwengxenye yemithetho emithathu, iPublic Order and Security Act, Access of Information and Protection of Privacy Act, iAIPPA le Broadcasting Services Act sekudale inkulumo intathelizindaba zisithi azizange zaziswe ngenguquko ekhona.
Imithetho le ikhangelelwe ukuhlaziywa ngesiphangiphangi ngoba amabandla aphatheke kunkulumo zokukhumisana umlotha avumelana ngeguquko lezi. Inguquko yePOSA igoqela ukuthi abalezikhalazo ngokungavunyezwa ukwenza umhlangano sekuzamele base izikhalazo zabo kumthethwandaba kamantshi hatshi umphathintambo wezokwenzakala elizweni njengalokhu obekwenziwa phansi kwalumthetho ungakaqulwa.
Ingxenye yomthetho we Broadcasting Services act eguquliweyo ibalisa ukuthi abafuna ukusungula imisakazo kumele yizizalwane zeZimbabwe kuphela. Kuthi inguquko yomthetho we AIPPA igoqela ukuthi intathelizindaba ziphiwe amalayisensi okusebenza embuthanweni kahulumende kuphela. Unobhala jikelele wenhlanganiso yentathelizindaba, iZimbabwe Union of Journalists, iZUJ, uMnu. Foster Dongozi utshele uChris Gande weStudio 7 ukuthi basola kakhulu amacele eMDC womabili ngokuvumelana leZanu PF ngendlela ababenza ngayo kodwa bona bengaziswanga lutho.