amalinks wokungena

Breaking News

Kambe Sengangenela Kudaba LweZimbabwe Na Umnu Jacob Zuma?


Ukunqoba kukaMnu Jacob Zuma ekhethweni lokudinga umkhokheli webandla elibusayo kweleSouth Africa ele African National Congress (ANC), sekulethe ithemba kuzizalwane zeZimbabwe ezikholwa ukuthi ulesibindi sokuchothoza uhulumende Kamongameli Robert Mugabe ngokwephulwa kwamalungelo oluntu. Intathelizindaba zethu uNtungamili Nkomo loBenedict Nhlapho bayalandisa.

Njengoba sekusobala ukuthi ukunqoba kukaZuma sekumuphe amandla phezu kwezinqumo zebandla elibusayo kukanti njalo angahle abe nguye umongameli ozathatha intambo zombuso ngo 2009, inengi lamaZimbabwe kuleli lithi lilethemba lokuthi ANC lohulumende weSouth Africa bazabonakala besola kungelakwesaba ukwephulwa kwamalungelo oluntu eZimbabwe. Ngeviki ephelileyo uZuma ukhwaze kwazwakala ngesikhathi esola labo abaqhuba imibuso yabo ntando kayiphikiswa kanye lenkokheli ezibekela begqilaza abantu wathi lazo kufanele zijeziswe nxa abaqhuba imibuso enjalo labo sebethonisiswa. Amazwi la abonakala ngabanengi njengokuthi ayekhuluma ngendlela uThabo Mbeki abamba ngayo udaba lweZimbabwe.

Inhlanganiso esanda kubunjwa yomanyano wenhlanganiso zeZimbabwe eziphandle kwelizwe eye Gobal Zimbabwe itshayele uMnu Zuma ihlombe yamkhuthaza yathi ilethemba lokuthi ubukhokheli bakhe buzakuba lesibindi ekusoleni umbuso woncindezelo lokwephulwa kwamalungelo oluntu eZimbabwe. Egwalweni olwethulelwe abezindaba yile inhlanganiso, icele njalo ukuthi inkokheli ezintsha ezikhethwe kanye loMnu Zuma zibheke udaba lokunikeza izizalwane zeZimbabwe ezikwele South Africa incwadi ezibapha imvumo yokuba selizweni ngokusemthethweni njengoba imbangela yokuza kwabo kuyikuwa komnotho osekubangelwe nguhulumende obusayo okwamanje.

Omunye oququzelela umbuso okhululekileyo eZimbabwe ongathandanga ukuthi igama lakhe livezwe, uthi okuthokozisayo yiokuthi uMnu Zuma usekelwa kakhulu zinhlanganiso ezifana leyezisebenzi eyeCOSATU eyaziwayo ngokusola langokutshengisela ngendlela uhulumende weZimbabwe abusa ngayo.

Esinye isizalwane seZimbabwe uSylvia Moyo uthi ulethamba lokuthi u Zuma uzasebenza nzima ukuthi ahluze inkinga zeZimbabwe okukhanya sezehlule umongameli Mbeki. Uthi njengoba uZuma ekhethwe ndawonye lequla lalabo abebevele besekela ubukhokheli bakhe kulethemba lokuthi bazalubambisana udaba lweZimbabwe. Uthi kulabo abathi uZuma ubhekane lamacala njalo kaqedisisi ngodaba lwengculaza kufanele bazi ukuthi lolodaba uZuma sewalucacisa kukanti sekuphele umnyaka lengxenye abomthetho besehluleka ukumethesa amacala lawo.

UMnu Tamuka Chirimambowa ohlaziya ezombusazwe njalo efundisa eUniversity of Kwazulu Natal uthi ulethemba lokuthi uMnu Zuma usebangeni elihle lokuqeda inkinga zeZimbabwe. Loba esithi lokhu kakuzukuba lula njengoba iANC iqakathekisa ubudlelwano bayo lamabandla ezombusazwe alwa impi yenkululeko, uthi banengi abakhethwe lomnumnzana Zuma abathukutheleyo ngendlela uhulumende kaMugabe abusa ngayo ngakho uzabe engayedwa emizameni yokuxazulula inkinga zeZimbabwe.

Kusenjalo ingcwethi kwezombusazwe uMnu George Mkhwananzi ongumsekeli njalo kamgchinisihlalo wenhlanganiso ekhankasela ukulotshwa kwesisekelo sombuso esitsha iNational Constitutional Assembly (NCA) uthi njengomkhokheli weANC uZuma selakho ukungenela kunkulumo ezilawulwa nguMbeki phakathi kweMDC leZanu PF laye aphe imbono yakhe yokuthi uMbeki enzeni ukuze kuxazululwe udaba lweZimbabwe.

Ezinye indaba ZeZimbabwe...

XS
SM
MD
LG